رشوت کا لین دین کسی بھی مہذب معاشرے میں ناپسندیدہ سمجھا جاتا ہے لیکن اس کے باوجود یہ خفیہ اور علانیہ طور پر رائج ہے۔
عام طور پر سرکاری کاموں کے لیے رشوت کا تبادلہ دیکھا جاتا ہے مگر ایک حیران کن واقعے میں ایک بیوی نے اپنے شوہر سے ہی ماں بننے کے عوض ایک ارب روپے سے زائد کی رشوت وصول کی۔
بھارتی میڈیا کے مطابق برطانوی نژاد خاتون ملائیکہ راجا جو دبئی میں مقیم ہے نے خود اس بات کا انکشاف کیا کہ اس نے اپنے بچے کی پیدائش کے لیے اپنے شوہر سے 33 کروڑ بھارتی روپے (پاکستانی کرنسی میں ایک ارب روپے سے زیادہ) طلب کیے اور شوہر نے بغیر کسی اعتراض کے یہ مطالبہ پورا کر دیا۔
ملائیکہ نے اعتراف کیا کہ اس نے یہ شادی مالی فائدے کے لیے کی تھی اور شادی کے وقت ہی شرط رکھی تھی کہ وہ اپنے اور بچے کے مالی تحفظ کی ضمانت کے بغیر ماں نہیں بنے گی۔
انہوں نے بتایا کہ اس رقم سے اس نے اپنی اور اپنی بچی کی ضروریات پوری کیں۔
بچی کے لیے 15 کروڑ روپے کا شاندار گھر خریدا گیا جبکہ باقی رقم قیمتی زیورات، ڈیزائنر لباس، گھر کی تزئین و آرائش، ایک گلابی جی ویگن کار اور دیگر پرتعیش اشیا پر خرچ کی گئی۔
ملائیکہ کے مطابق ان کی اپنے شوہر سے پہلی ملاقات 2017 میں ہوئی تھی اور اسی سال دونوں نے شادی کر لی تھی۔
