بھارتی کرکٹ ٹیم کے نوجوان بیٹر ابھیشیک شرما نے انگلینڈ کیخلاف پانچویں اور آخری ٹی 20 میچ میں جارحانہ بیٹنگ کرتے ہوئے شاندار سنچری اسکور کی اور کئی ریکارڈ اپنے نام کرلیے۔
اتوار کو ممبئی میں انگلینڈ اور بھارت کے درمیان پانچواں اور سیریز کا آخری ٹی ٹوئنٹی میچ کھیلا گیا، میزبان ٹیم نے میچ میں 150 رنز کے بڑے مارجن سے کامیابی حاصل کرتے ہوئے سیریز بھی 1-4 سے اپنے نام کرلی۔
بھارت نے انگلینڈ کی دعوت پر بیٹنگ کرتے ہوئے مقررہ 20 اوورز میں 9 وکٹوں پر 247 رنز کا پہاڑ کھڑا کردیا، جس میں نوجوان اوپنر ابھیشیک شرما نے ریکارڈ ساز اننگز کھیلی۔
ابھیشیک شرما نے 37 گیندوں پر دھواں دھار سنچری اسکور کی اور مجموعی طور پر 54 گیندوں پر 13 چھکوں اور 7 چوکوں کی مدد سے 135 رنز بنائے۔
ابھیشیک نے بھارت کی جانب سے ٹی 20 انٹرنیشنل میں دوسری تیز ترین سنچری اسکور کی، اس سے قبل روہت شرما نے 35 گیندوں پر سنچری بنائی تھی۔
انگلینڈ کیخلاف 135 رنز کی اننگز کی بدولت ابھیشیک شرما بھارت کی جانب سے ٹی 20 انٹرنیشنل میں سب سے بڑا انفرادی اسکور بنانے والے کھلاڑی بن گئے، اس سے قبل یہ ریکارڈ شبمن گل کے پاس تھا جنہوں نے 126 رنز کی اننگز کھیلی۔
انگلینڈ کیخلاف 13 چھکے مارنے والے ابھیشیک شرما نے ٹی 20 انٹرنیشنل میچ میں بھارت کی جانب سے ایک اننگز میں سب سے زیادہ چھکے مارنے کا ریکارڈ بھی اپنے نام کرلیا۔
بھارتی ٹیم کے 247 رنز کے جواب میں انگلش ٹیم 11 ویں اوور میں صرف 97 رنز بناکر آؤٹ ہوگئی تھی۔
