قلعہ عبداللہ میں سیکیورٹی فورسز نے چوکی پر خوارج کا حملہ ناکام بناتے ہوئے 5 خارجیوں کو ہلاک کردیا جبکہ فائرنگ کے تبادلے میں 2 جوان بھی شہید ہوگئے۔
پاک فوج کے شعبہ تعلقات عامہ ( آئی ایس پی آر ) کی جانب سے جاری کردہ بیان کے مطابق قلعہ عبداللہ کے علاقے گلستان میں خوارجیوں نے چیک پوسٹ میں داخل ہونے کی کوشش کی جسے سیکیورٹی فورسز نے ناکام بنا دیا تاہم دہشتگردوں نے بارود سے بھری گاڑی چوکی کی دیوار سے ٹکرا دی۔
آئی ایس پی آر کے مطابق اس دوران سیکیورٹی فورسز اور خوارج کے درمیان فائرنگ کا تبادلہ ہوا جس کے نتیجے میں 2 خودکش بمباروں سمیت پانچوں خوارج ہلاک ہوگئے۔
شدید فائرنگ کے تبادلے کے دوران 2 جوان نائیک طاہر خان اور لانس نائیک طاہر اقبال بھی شہید ہو گئے۔
بیان میں بتایا گیا کہ علاقے میں سرچ آپریشن کیا جا رہا ہے اور اس گھناؤنے فعل کے مرتکب افراد کو انصاف کے کٹہرے میں لایا جائے گا۔
آئی ایس پی آر کا مزید کہنا تھا کہ سیکیورٹی فورسز دہشت گردی کی لعنت کو ختم کرنے کے لیے پرعزم ہیں اور ہمارے بہادر جوانوں کی ایسی قربانیاں ہمارے عزم کو مزید مضبوط کرتی ہیں۔
بنوں آپریشن
آئی ایس پی آر کے مطابق خیبر پختونخوا کے ضلع بنوں میں بھی خوارج کی موجودگی کی اطلاع پر انٹیلی جنس پر مبنی آپریشن کیا گیا جس کے دوران 3 خوارج جہنم واصل ہوئے جبکہ 9 زخمی ہوئے۔
وزیر اعظم کا جوانوں کی شہادت پر رنج و الم کا اظہار
وزیر اعظم شہباز شریف نے 5 خارجیوں کو ہلاک کرنے پر سیکیورٹی فورسز کی پزیرائی کی اور 2 جوانوں کی شہادت پر رنج و الم کا اظہار کرتے ہوئے شہداء کے اہل خانہ کے لیے صبر و استقامت کی دعا کی۔
اپنے خصوصی بیان میں شہباز شریف کا کہنا تھا کہ انسانیت کے دشمنوں کے مذموم عزائم کو ہرگز کامیاب نہیں ہونے دیں گے اور دہشتگردی کے خلاف جنگ میں اپنی جانوں کا نذرانہ پیش کرنے والے سیکیورٹی فورسز کے نڈر نوجوانوں کی قربانیاں رائیگاں نہیں جائیں گی۔
وزیراعظم کا کہنا تھا کہ قوم کو دہشتگردوں کے خلاف سیسہ پلائی دیوار کی مانند کھڑے سیکیورٹی فورسز کے سپوتوں پر فخر ہے اور حکومت اور سیکیورٹی فورسز ملک سے دہشتگردی کے مکمل خاتمے کے لیے پر عزم ہیں۔
وزیر داخلہ کا خراج تحسین
وفاقی وزیرداخلہ محسن نقوی نے دہشتگردوں کا حملہ ناکام بنانے پر سیکیورٹی فورسز کو خراج تحسین پیش کیا ہے۔
اس حوالے سے جاری اپنے خصوصی بیان میں وزیر داخلہ کا کہنا تھا کہ خوارجی دہشتگردوں کا حملہ پسپا کرنے پر سکیورٹی فورسز کو شاباش دیتے ہیں اور فورسز نے بروقت کارروائی کرکے 5 خوارجی دہشتگردوں کو جہنم واصل کیا۔
وزیر داخلہ کا کہنا تھا کہ شہید نائیک طاہر خان اور شہید لانس نائیک طاہر اقبال کی جرات کو سلام پیش کرتے ہیں۔
محسن نقوی نے شہدا کے خاندانوں سے دلی ہمدردی اور تعزیت کا اظہار کرتے ہوئے کہا کہ شہدا کی قربانیوں کو قوم قدر کی نگاہ سے دیکھتی ہے اور شہدا کی عظیم قربانیوں کو فراموش نہیں کیا جاسکتا۔
