مسلم لیگ (ن) کے رہنماء اختیار ولی اور تحریک انصاف کے رہنماء نعیم حیدر پنجوتھا کے درمیان لائیو ٹاک شو میں جھگڑا ہوگیا، دونوں سیاسی رہنماء گھتم گھتا ہوگئے، ایک دوسرے پر تھپڑوں، مکوں کی بارش کردی، ویڈیو سوشل میڈیا پر وائرل ہوگئی۔
سماجی رابطے کی ویب سائٹ فیس بک پر وائرل ہونیوالی ویڈیو میں دیکھا جاسکتا ہے کہ نجی ٹی وی کے کرنٹ افیئر پروگرام میں ن لیگی رہنماء اختیار ولی خان اور پی ٹی آئی کے نعیم حیدر پنجوتھا کے درمیان تلخ کلامی کے بعد ہاتھ پائی ہوگئی، جس میں دونوں کو ایک دوسرے پر چیختے ہوئے سنا اور دیکھا جاسکتا ہے۔
سوشل میڈیا پر وائرل ویڈیو میں نظر آرہا ہے کہ دونوں سیاسی رہنماء ایک دوسرے کی قیادت کیخلاف نازیبا الفاظ استعمال کرتے ہیں، اسی دوران اختیار ولی اچانک اٹھ کر پی ٹی آئی رہنماء پر حملہ کردیتے ہیں۔
ویڈیو کے مطابق چند ہی لمحوں میں نعیم حیدر پنجوتھا بھی سیٹ سے کھڑے ہوجاتے ہیں اور دونوں آپس میں گتھم گتھا ہوجاتے ہیں، اسٹوڈیو میں موجود عملہ ان کے درمیان بیچ بچاؤ کرواتا ہے۔
واضح رہے کہ یہ پہلا موقع نہیں جب ٹاک شو میں مسلم لیگ (ن) اور پی ٹی آئی رہنماء کے درمیان جھگڑا ہوا ہو، اس سے قبل بھی ایک ٹی وی شو میں لیگی رہنماء سینیٹر افنان اللہ اور پی ٹی آئی رہنماء شیر افضل مروت کے درمیان ہاتھا پائی ہوئی تھی۔
