وفاقی وزیرداخلہ محسن نقوی نے کہا ہے امریکی صدر ڈونلڈ ٹرمپ دنیا کے لئے امن کی امید بنے ہیں ۔ ان کے دور میں پاک امریکہ تعلقات کو نئی جہت ملےگی ۔ صدرٹرمپ کا اولین خطاب عالمی امن اور تنازعات کے حل میں حوصلہ افزا ہے۔
وزیر داخلہ نے ان خیالات کا اظہار امریکہ میں ارکان کانگریس جو ولسن اور روب بریسنہان سے ملاقاتوں میں کیا۔ جن میں باہمی دلچسپی کے امور ، پاک امریکہ تعلقات کے فروغ ، خطے میں پائیدار امن خصوصا افغانستان کی صورتحال پر تبادلہ خیال کیا گیا ۔
ملاقات میں پاک امریکا تعلقات کو مزید فروغ کے عزم کا اظہار کیا گیا ۔ فریقین نے پاک امریکا تجارتی و ثقافتی وفود کے باہمی تبادلے بڑھانے پر زور دیا۔ وزیر داخلہ نے پاک امریکا تعلقات کے فروغ کیلئے ہرسطح پرمکمل تعاون کی یقین دہانی کرائی۔
کانگریس مینز جو ولسن اورروب بریسنہان کو پاکستان کے دورے کی دعوت بھی دی ۔ ملاقاتوں میں مختلف شعبوں میں تعاون بڑھانے ، اوورسیز پاکستانیوں کے مسائل کے حل کیلئے اقدامات پر بھی گفتگو کی گئی ۔ امریکا میں پاکستانی سفیر رضوان سعید شیخ بھی اس موقع پر موجود تھے۔
