پاکستان شاہینز اور ویسٹ انڈیز کے درمیان پریکٹس میچ بے نتیجہ ختم ہوگیا جبکہ میچ کے دوران شاہینز کے 2 کھلاڑی زخمی ہوگئے۔
پاکستان شاہینز اور ویسٹ انڈیز کی ٹیمیں 3 روزہ پریکٹس میچ کے لئے راولپنڈی اسٹیڈیم میں مدمقابل تھیں جہاں مہمان ٹیم نے 312 رنز کا ہدف دیا جس کے جواب میں شاہینز 2 وکٹوں کے نقصان پر 128 رنز بناسکے اور دن کا اختتام ہوگیا جس کے باعث میچ بے نتیجہ ختم ہوگیا۔
ویسٹ انڈیز نے پہلی اننگز میں 8 وکٹوں کے نقصان پر 346 رنز بنائے تھے اور پاکستان نے 212 رنز پر اننگز ڈکلیئر کر دی تھی جس کے بعد ویسٹ انڈیز نے دوسری اننگز میں 5 وکٹوں کے نقصان پر 177رنز بنائے تھے۔
پاکستان کی جانب سے محمد حریرہ نے 80 رنز بنائے۔
دو کھلاڑی زخمی
میچ کے دوران پاکستان کے 2 بلے باز محمد سلیمان اور محمد حریرہ زخمی ہوئے۔
محمد سلیمان کو وہریکن کی گیند پاؤں پر لگی اور انہوں نے صرف دو گیندیں کھیلی تھیں۔
محمد حریرہ کو بھی فاسٹ باؤلر کی گیند منہ پر لگی تھی جس کے بعد انہیں طبی امداد دی گئی اور میچ کافی دیر رکا رہا ۔
واضح رہے کہ محمد حریرہ ویسٹ انڈیز کے خلاف ٹیسٹ سیریز کے لئے اعلان کردہ قومی اسکواڈ کا حصہ ہیں۔
علاوہ ازیں انگلی پر چوٹ کے باعث غازی غوری بھی آج وکٹ کیپنگ نہیں کر سکے تھے اور روحیل نزیر نے آج کھانے کے وقفہ تک کیپنگ کی۔
پاکستان شاہینز کے علی زریاب پہلے ہی تین روزہ میچ سے باہر ہو چکے ہیں ، سعد خان کو بھی پہلے روز شاٹ مڈ وکٹ پر فیلڈ کرتے بال لگی تھی اور پھر گراؤنڈ میں فیلڈنگ کے دوران گر گئے تھے تاہم، تھوڑی دیر بعد پھر فیلڈنگ کا آغاز کر دیا تھا۔
