ضلع خیبرمیں پیش آنے والی صورتحال، وزیر اعلی خیبر پختونخوا سردار علی امین گنڈاپور کی زیر صدارت حکومتی اور اپوزیشن اراکین صوبائی اسمبلی کی ملاقات ہوئی ہے۔
اسپیکر صوبائی اسمبلی بابرسلیم سواتی کےعلاوہ حکومتی اراکین صوبائی اسمبلی اور اپوزیشن جماعتوں کےپارلیمانی لیڈرز اور اراکین اسمبلی نے شرکت کی،کل وزیر اعلی ہاوس میں تمام سیاسی پارٹیوں کےقائدین اورپارلیمنٹیرینز کا اجلاس منعقد کرنے کا فیصلہ کیا گیا،وفاقی وزیر داخلہ اجلاس میں وفاقی حکومت کی نمائندگی کریں گے۔
دوران اجلاس سردار علی امین گنڈاپور نے کہا آج صوبائی اسمبلی کے اجلاس میں تمام سیاسی پارٹیوں کے ممبران اسمبلی نے متفقہ طور پر ایک قرارداد منظور کی ہے،پختون تحفظ مومنٹ کے قومی جرگے کے انعقاد کے حوالے سے آج کے ناخوشگوارواقعے اور وفاق کی طرف سے اسےکالعدم تنظیم قرار دینے کے بعد کشیدہ صورتحال کے تناظر میں حکومتی اور اپوزیشن اراکین پر مشتمل ایک کمیٹی تشکیل دی گئی ہے۔
وزیر اعلی نےمزید کہا کہ کمیٹی میں شامل ان اراکین اسمبلی نے اس مسئلے کا حل نکالنے کے لئے مجھ پر اعتماد کرکے مجھے لیڈر بنایا ہے،ہم نے اس مسئلے کا حل نکالنا ہے ، یہ سب ہمارے لوگ ہیں اور ہماری ذمہ داری بنتی ہے کہ ہم اپنے صوبے کے اندر لوگوں کے جان و مال کی حفاظت کریں،میں اس مسئلے کے پر امن حل کے لئے تعاون پر تمام اپوزیشن اور حکومتی اراکین اسمبلی کا مشکور ہوں۔
اس سلسلے میں ہم نے وفاقی حکومت سے بھی رابطہ کیا ہے اور وفاقی حکومت نے بھی حکومتی اور اپوزیشن اراکین کے اس اقدام کو خوش آئیند قرار دیا ہے،اس معاملے کے پر امن حل کے سلسلے میں کل وفاق کی طرف سے وزیر داخلہ پشاور تشریف لائیں گے،اس حوالے سے کل وزیر اعلی ہاوس پشاور میں ایک اہم اجلاس منعقد کیا جائے گا۔
اس اجلاس میں شرکت کے لئے ہم نے تمام سیاسی جماعتوں کے قائدین کو دعوت دی ہے،اجلاس میں صوبے کےتمام پارلیمنٹیرینز بھی شرکت کریں گے،پوری امید ہے کہ ہم سب مل بیٹھ کر اس صوبے اور ملک کی امن امان کے لئے ایک ایسا راستہ نکالنے میں کامیاب ہونگے جسے یہ مسئلہ پر امن انداز میں حل ہوگا۔ہماری نیت صاف ہے اور اللہ تعالی اس مسئلے کے حل میں ہماری مدد کرے گا، وزیر اعلی
میں تمام پارلیمنٹیرینز کاشکرگزار ہوں کہ انہوں نےاس مسئلے کی سنجیدگی کو سمجھتے ہوئے ہماری مدد کر رہے ہیں،میں خیبر پختونخواہ حکومت کی طرف سے ایک دفعہ پھر ان سب کا شکریہ ادا کرتا ہوں۔
