پلاننگ اینڈ ڈویلپمنٹ بورڈ پنجاب نے قومی احتساب بیورو کو گجرات اور منڈی بہائوالدین کے ترقیاتی منصوبوں سے متعلق ریکارڈ فراہم کردیا۔
تفصیلات کے مطابق گجرات کی 145 ترقیاتی منصوبوں کی تمام دستاویزات قومی احتساب بیورو کو فراہم کی گئی ہیں، جن کے مطابق گجرات کے 145 ترقیاتی منصوبوں کیلئے 48 ارب 82 کروڑ65 لاکھ 94 ہزار روپے لاگت تھی ۔
اسی طرح منڈی بہائوالدین کے 72 ترقیاتی منصوبوں کے فنڈز کی تفصیلات بھی قومی احتساب بیورو کو فراہم کر دی گئی ہیں، منڈی بہائوالدین کے 72 ترقیاتی منصوبوں کی لاگت 21 ارب 47 کروڑ58 لاکھ 88 ہزار ہے۔
نیب کو فراہم کیے گئے گجرات کے ریکارڈ میں 9 ارب سے زائد لاگت کے دو منصوبوں کی تفصیلات شامل ہیں،اور ان میں نیب کو 9 ارب 92 کروڑ کی لاگت کے پرانا جی ٹی روڈ گجرات سے لکھن وال سڑک کی تعمیر کے منصوبے کی دستاویزات شامل ہیں۔
پلاننگ اینڈ ڈویلپمنٹ بورڈ کی جانب سے9 ارب 86 کروڑ کی لاگت کے جی ٹی روڈ کو دو رویہ کرنے، فلائی اوور کی تعمیر کے منصوبے کی تفصیلات بھی نیب کو دے دی گئیں،5 ارب 43 کروڑ کی لاگت کے شہباز پور کے مقام پر دریائے چناب پر پل کی تعمیر کے منصوبے کی دستاویزات بھی دے دی گئیں۔
پنجاب پی اینڈ ڈی کی جانب سے نیب کو 3 ارب کے کھاریاں، ڈنگہ روڈ، اڑھائی ارب کے ڈھل بنگھی سڑک کی تعمیر کے منصوبے کی تفصیلات بھی فراہم کی گئی ہیں۔
