پاکستان تحریک انصاف ( پی ٹی آئی ) کے رہنما میاں محمود الرشید کو سروسز اسپتال سے ڈسچارج کر دیا گیا۔
تحریک انصاف کے رہنما میاں محمود الرشید کو سروسز اسپتال سے ڈسچارج کر کے واپس کیمپ جیل بھیج دیا گیا ہے۔
پی ٹی آئی رہنما کے بیٹے حسن محمود نے الزام لگایا ہے کہ دو روز قبل اپنڈکس پھٹنے پر انکے والد کی سرجری ہوئی اور پنجاب حکومت نے زبردستی محمود الرشید کو اسپتال سے جیل شفٹ کیا ہے۔
اہلخانہ کا کہنا تھا کہ محمود الرشید کو اسپتال سے جبری ڈسچارج کرنے کی مذمت کرتے ہیں۔
حسن محمود کا کہنا تھا کہ محمود الرشید کی 2 روز قبل اپنڈکس پھٹنے پر سرجری کی گئی، اپینڈکس پھٹنے پر معدہ شدید متاثر ہوا۔
ان کا کہنا تھا کہ شدید گرمی ہے اور محمود الرشید کا زخم خراب ہونے کا خدشہ ہے، انہیں اس حالت میں جیل شفٹ کرنا انسانی حقوق کی پامالی ہے۔
