وزیراعظم شہباز شریف نے شینزن میں چینی کمپنی ترانشیئن ہولڈنگز کے چئیرمین ژو ژاو جیانگ سے ملاقات کی۔ چینی کمپنی نے پاکستان میں موبائل بنانے کے یونٹ میں سرمایہ کاری میں وسعت لانے کے عزم کا اظہار کیا۔
ترانشیئن ہولڈنگز کے چئیرمین نے پاکستان میں موبائل فونز کی تیاری، الیکٹرک بائیکس، زراعت اور فِن ٹیک میں سرمایہ کاری میں دلچسپی کا اظہار کیا۔ وزیراعظم نے وفاقی وزرا کو چینی کمپنی سے مل کر جلد لائحہ عمل تیارکرنے کی ہدایت کی۔
وزیراعظم نے کہاحکومت غیرملکی سرمایہ کاروں و کاروباری شخصیات کو سہولیات یقینی بنا رہی ہے۔ وزیراعظم نے چینی کمپنی کو مقامی سطح پر اشیا تیار کرکے پاکستان سے برآمدات کرنے کی بھی دعوت دی۔
وزیراعظم کا کہنا تھا کہ پاکستان میں ہرقسم کے وسائل ہیں اور سب سے بڑی طاقت نوجوان افرادی قوت ہے۔ چیئرمین کمپنی نے بریفنگ میں بتایا کہ اُن کی کمپنی کا پاکستان میں موبائل فونز کی تیاری کا ایک یونٹ قائم ہے۔ پہلے یونٹ میں پانچ ہزار سے زائد پاکستانیوں کو روزگار فراہم کیا گیا ہے۔ موبائل فونز کی تیاری میں اپنی سرمایہ کاری بڑھانا چاہتے ہیں۔ موبائل فونز تیاری سے پاکستان سے بیرون ملک برآمدات میں اضافہ ہوگا۔
