پاکستان سمیت دنیا بھر میں اقوام متحدہ کے امن دستوں کا عالمی دن آج منایا جا رہا ہے۔ عظیم فرض کی انجام دہی میں اب 181 پاکستانی اپنی جانوں کے نذرانے پیش کر چکے ہیں۔
آئی ایس پی آر کے مطابق پاکستان کے تین ہزار اہلکار دنیا بھر میں اقوام متحدہ کے امن مشنز میں خدمات انجام دے رہے ہیں۔ پاکستان نے 1960 سے اب تک دنیا کے 29 ممالک میں 48 اقوام متحدہ کے مشنز میں حصہ لیا۔
ترجمان پاک فوج کے مطابق عظیم فرض کی انجام دہی میں ابتک 181 پاکستانی شہادت کے رتبے پر فائز ہوئے۔ آج کا دن منانے کا مقصد عالمی امن کے لیے جانوں کا نذرانہ پیش کرنے والوں کو خراج عقیدت پیش کرنا ہے۔
آئی ایس پی آر کے مطابق پاکستان اقوام متحدہ کے امن مشن میں سب سے زیادہ تعاون کرنے والے ممالک میں سے ایک ہے۔ امن مشنز جمہوریہ کانگو، جنوبی سوڈان، وسطی افریقی اور صومالیہ سمیت دیگر ممالک میں تعینات ہیں۔
