فیڈرل بورڈ آف ریونیو (ایف بی آر) نے یکم جولائی سے غیررجسٹرڈ تاجروں کیخلاف کارروائی کا اعلان کردیا۔
حکومت کی تاجر دوست اسکیم کی طرف تاجر برادری کا ہی غیر دوستانہ رویہ برقرار ہے، 3 اپریل کی ڈیڈ لائن گزرنے کے تین ہفتے بعد بھی رجسٹرڈ تاجروں کی تعداد 12 ہزار کے لگ بھگ تک ہی پہنچ سکی۔ ایف بی آر نے غیر رجسٹرڈ تاجروں کیخلاف یکم جولائی سے سخت کارروائی کا اعلان بھی کردیا ہے۔
تاجر برادری کے عدم تعاون کے باعث تاجر دوست اسکیم پرعملدرآمد سست روی کا شکار ہے، تاجروں کی لازمی رجسٹریشن سے متعلق تاجردوست اسکیم کااجراء 22 مارچ 2024 کوکیا گیا تھا۔
ایف بی آر حکام کاکہنا ہے ملک میں 37 لاکھ ریٹیلرز میں سے صرف تین لاکھ کے قریب سالانہ ٹیکس گوشوارے جمع کرواتے ہیں،اس اسکیم کے تحت ایف بی آرنے یکمشت ٹیکس ادائیگی پر پچیس فیصدرعایت کا اعلان کیا تھا۔
یہ اسکیم 6 بڑے شہروں کراچی، لاہور، پشاور، کوئٹہ، راولپنڈی اور اسلام آباد کیلئے شروع کی گئی تھی۔ تاجروں کو آسان ماہانہ اقساط میں ٹیکس ادائیگی کی سہولت دی گئی ہے، رجسٹرین موبائل ایپ میں تاجر دوست پیج کے ذریعے کروائی جا سکتی ہے جس کیلئے کسی فیس یا وکیل کی ضرورت نہیں ہے۔
