جرمنی کے ایک نوجوان نے محض ایک منٹ میں سوا کلو کے قریب شہد کھا کر گنیز ورلڈ ریکارڈ میں اپنا نام درج کروا لیا۔
شہد دنیا بھر میں پسند کی جانے والی غذاؤں میں شمار ہوتا ہے، تاہم ایک منٹ کے اندر ایک کلو سے زائد شہد کھا لینا بظاہر ناممکن دکھائی دیتا ہے۔
شہد کی گاڑھی ساخت کے باعث اسے اتنی تیزی سے نگلنا پانی یا کولڈ ڈرنک پینے جتنا آسان نہیں، یہی وجہ ہے کہ یہ ایک انتہائی مشکل چیلنج سمجھا جاتا ہے۔
یہ منفرد کارنامہ جرمنی کے نوجوان Andre Ortolf نے انجام دیا، جو عجیب و غریب اور منفرد عالمی ریکارڈز بنانے کے حوالے سے شہرت رکھتے ہیں۔
اینڈرے اورٹولف نے صرف 60 سیکنڈز میں 1,273 گرام، یعنی تقریباً سوا کلو شہد کھا کر گنیز ورلڈ ریکارڈ میں ایک نیا عالمی اعزاز اپنے نام کیا۔
سوشل میڈیا پر وائرل ہونے والی ویڈیو میں دیکھا جا سکتا ہے کہ وہ ایک بڑے چمچ کی مدد سے شہد سے بھرے برتن سے انتہائی تیز رفتاری کے ساتھ شہد کھاتے رہے، جسے دیکھ کر صارفین حیران رہ گئے۔
ماہرین کے مطابق اتنی تیزی سے شہد کھانا عام افراد کے لیے خطرناک ثابت ہو سکتا ہے اور اس سے گلے میں شہد پھنسنے یا سانس رکنے جیسے مسائل پیدا ہونے کا خدشہ رہتا ہے۔
