امریکا اور ایران کے درمیان اسلام آباد مفاہمتی یادداشت پر دستخط کے بعد تیل کی قیمتوں میں مسلسل کمی کا رجحان ہے۔
عالمی میڈیا کے مطابق عالمی منڈیوں میں خام تیل کی قیمتوں میں 3فیصد تک کمی ہوگئی، امریکی خام تیل ڈبلیوٹی آئی 74.68ڈالرفی بیرل پر آگیا جبکہ برینٹ کروڈ آئل کی قیمت 77.68ڈالرفی بیرل ہوگئی۔
واضح رہے کہ ایران جنگ شروع ہونے سے قبل عالمی مارکیٹ میں خام تیل کی قیمت 73 ڈالر کے لگ بھگ تھی جو جنگ کے دوران بلند ترین سطح 126 ڈالر سے اوپر بھی گئی تھی۔
عالمی منڈی کے زیراثر ملک میں بھی پٹرولیم مصنوعات کی قیمتوں میں کمی کا قومی امکان ہے۔ وزیر پیٹرولیم علی پرویز ملک نے ایکس پر اپنے بیان میں کہا ہے کہ عالمی سطح پر تیل کی قیمتوں میں کمی کے باعث عوام کو ریلیف ملنے کے امکانات روشن ہو گئے ہیں۔
علی پرویز ملک نے کہا کہ ایران امریکا کشیدگی میں کمی کے آثارسامنے آنے کے بعد عالمی منڈی میں تیل کی قیمتیں نیچے آنا شروع ہو گئی ہیں اور وزیراعظم کی ہدایت ہے کہ قیمتوں میں کمی کا فائدہ فوری طور پر عوام تک پہنچایا جائے۔
انہوں نےکہاکہ پٹرولیم مصنوعات کی قیمتوں کے تعین کیلئے شفاف فارمولا تیارکیا جائے گا جبکہ ہفتہ وار قیمتوں کے تعین کیلئے اعلیٰ سطح کی کمیٹی بھی قائم کردی گئی ہے، توقع ہےکہ آنے والے جمعے کو حکومت کی جانب سے پیٹرولیم مصنوعات کی قیمتوں میں واضح کمی کا اعلان کیا جائے گا۔
