ترجمان ایم کیو ایم کا کہنا ہے کہ بلاول بھٹو زرداری کی تقریر سے واضح ہوا کہ ایم کیو ایم آج بھی بلاول کے اعصاب پر سوار ہے، اٹھارہ سال کے تباہ حال سندھ میں نجی اداروں کے فنڈز سے ایک شاہراہ کا افتتاح، پیپلز پارٹی کے سیاسی دیوالیہ پن کا اعتراف ہے۔
ایک بیان میں ترجمان ایم کیوایم نے کہا کہ اٹھارہ سال کی لوٹ مار اور نااہلی کو نمائشی منصوبوں سے نہیں چھپایا جا سکتا، بھٹو کے نام سے یہ آج بھی شہری سندھ کے عوام کا خون چوس رہے ہیں، سندھ کے عوام بجلی، پانی، نکاسی آب، گیس اور ٹرانسپورٹ سے محروم، حکمران صرف افتتاحی تقریروں میں مصروف ہیں ۔
ترجمان ایم کیو ایم کا کہنا ہے کہ پیپلز پارٹی عالمی اداروں اور نجی شراکت داری سے بننے والے منصوبوں کا کریڈٹ لینے کی ناکام کوشش کر رہی ہے، یونیورسٹی روڈ کو تباہ و برباد ہوئے نصف دہائی ہونے کو ہے، بلاول اس سے دامن چھڑا نہیں سکتے، پیپلز پارٹی نے سندھ کو صرف بدعنوانی، بے روزگاری اور محرومی دی، دیہی اور شہری سندھ یکساں طور پر پیپلز پارٹی کی نااہلی اور بے حسی پر نوحہ کناں ہیں۔
ترجمان ایم کیوایم نے کہا کہ جمہوریت کے نام پر جعلی اکثریت قائم رکھنے والوں نے سندھ کو پسماندگی کی دلدل میں دھکیل دیا، سندھ کے غیور عوام اب لفاظی نہیں بلکہ کارکردگی کا حساب مانگ رہے ہیں، وقت قریب ہے جب سندھ کے مظلوم عوام جاگیردارانہ سیاست کو مسترد کر دیں گے، سندھ کی دھرتی کو سیاسی اشرافیہ اور کرپٹ ٹولے سے نجات دلانا وقت کی اہم ضرورت ہے۔
