پنجاب کے ڈسٹرکٹ راجن پور کے طلبہ و طالبات نے ایک دن پاک فوج کے ساتھ گزارا ، یاد گار شہداء پر حاضری دی اور پھول چڑھائے جبکہ وطن عزیز کے شہداء کے بلند درجات کے لیے خصوصی دعا بھی کی۔
اس موقع پر طلباء کو پاک فوج کی ملک و قوم کے لیے دی گئیں لازوال قربانیوں کے بارے میں بریفنگ دی گئی جبکہ اسالٹ کورس اور فوجی زندگی کا نمونہ بھی دکھایا گیا۔
اس کے علاوہ طلبہ و طالبات کو فائرنگ کے طریقہ کار کے بارے میں بھی آگاہی فراہم کی گئی جبکہ طلباء کو بکتر بند گاڑیوں کی سیر کروائی گئی جس سے وہ خوب لطف اندوز ہوئے۔
اس دورے کا مقصد عوام اور فوج کے درمیان تعلقات کو مزید مستحکم بنانا تھا۔
طلبہ و طا لبات کا کہنا تھا کہ پاک فوج سے ہم بہت زیادہ متاثر ہوئے ہیں، شہداء کی قربانیوں کی وجہ سے آج ہم ایک آزاد وطن میں زندگی گزار رہے ہیں، پاک فوج کے پاس ایسا جدید ترین اسلحہ موجود ہے جو کسی بھی دشمن کا مقابلہ کرنے کے لیے کافی ہے۔
ان کا کہنا تھا کہ اس طرح کے ایونٹ ہونے چاہییں تاکہ ہماری عوام کو پتا چل سکے کہ ہماری فوج ملک کی کیسے خدمت کر رہی ہے۔
