سینٹرل ڈیویلپمنٹ ورکنگ پارٹی نے 123 ارب روپے سے زیادہ لاگت کے گیارہ مختلف ترقیاتی منصوبے کلئیر کر دیئے، 108 ارب روپے لاگت کے چار بڑے منصوبوں کی حتمی منظوری ایکنک سے لی جائے گی۔ خصوصی طلباء کیلئے وہیل چیئر اور لیپ ٹاپ اسکیم کی منظوری بھی دیدی گئی ہے ۔
وفاقی وزیر منصوبہ بندی احسن اقبال کی زیر صدارت اجلاس میں 15 ارب 17 کروڑ روپے لاگت کے 7 ترقیاتی منصوبوں کی حتمی منظوری دی گئی جبکہ 108 ارب 16 کروڑ روپے لاگت کے چار بڑے منصوبے حتمی منظوری کیلئے ایکنک کو بھجوا دیئے گئے۔
اجلاس میں تعلیم، صحت، آئی ٹی، بجلی اور پانی کے منصوبوں پر غور کیا گیا۔ آزاد کشمیر حویلی کہوٹہ میں دانش اسکول کے قیام کی منظوری دی گئی۔ تقریبا 8 رب روپے لاگت کاڈی ایچ کیو اسپتال حافظ آباد اپ گریڈیشن منصوبہ ایکنک کو منتقل کر دیا گیا۔
نیشنل ہیلتھ سپورٹ پروگرام خیبر پختوانخوا کی منظوری دی گئی۔ اسلام آباد میں لینڈ ریکارڈ ڈیجیٹل سسٹم کی منظوری بھی دی گئی۔ کوئٹہ میں سپریم کورٹ برانچ رجسٹری کے ایڈمن بلاک کی تعمیر اور پاکستان آڈٹ اینڈ اکاؤنٹس اکیڈمی اسلام آباد منصوبہ منظور کر لیا گیا۔
حیسکو اور پیسکو کے بجلی نظام بہتری منصوبے ایکنک کو بھجوا دیے گئے۔ گلگت بلتستان میں ہائیڈرو پاور و رینیوایبل انرجی منصوبہ منظور کیا گیا۔ وزیر منصوبہ بندی نے کہا کہ تمام منصوبے حکومت کے وژن اڑان پاکستان کے تحت شروع کیے جا رہے ہیں۔
