کوئٹہ اور بارکھان میں محکمہ انسداد دہشت گردی (سی ٹی ڈی) کی کارروائیوں میں 14 دہشت گرد ہلاک ہوگئے۔
ترجمان سی ٹی ڈی کے مطابق کوئٹہ کے علاقے درخشاں میں خفیہ اطلاع پر کارروائی کی گئی، کارروائی کے دوران فائرنگ کے تبادلے میں 8 دہشت گرد مارے گئے، دہشت گردوں کے قبضے سے بھاری تعداد میں اسلحہ برآمد کر لیا گیا۔
مارے گئے دہشت گردوں کا تعلق کالعدم تنظیم سے تھا، دہشت گرد فورسز سرکاری تنصیبات اور شہریوں پر حملوں میں ملوث تھے۔
کاروائی کے دوران سی ٹی ڈی کے تین اہلکار زخمی بھی ہوئے،جنہیں طبی امداد کے لئے اسپتال منتقل کر دیا گیا ہے۔
دوسری جانب بلوچستان کے ضلع بارکھان کے علاقے رکھنی میں خفیہ اطلاع پر انٹیلی جنس بیسڈ آپریشن کیا گیا، سی ٹی ڈی کی کارروائی میں 6 دہشتگرد ہلاک ہوگئے۔ دہشت گردوں سے اسلحہ اور بارودی مواد برآمد کرلیا گیا۔
پولیس اسٹیشن اور کسٹم چیک پوسٹ پر حملے
خیبرپختونخوا کے ضلع ڈیرہ اسماعیل خان میں میں شرپسندوں کے حملے میں ایک پولیس اہلکار شہید جبکہ دو کسٹم اہلکار زخمی ہوگئے۔
پولیس حکام کے مطابق ڈی آئی خان کے تھانہ یارک پر نامعلوم شرپسندوں کے حملے میں ایک پولیس اہلکار شہید ہوگئے، پولیس کی جوابی کارروائی میں حملہ آور پسپا ہوگئے۔
حکام کے مطابق فرار ہوتے شرپسندوں نے قریبی کسٹم چیک پوسٹ پر بھی حملہ کردیا، کسٹم چیک پوسٹ پر حملے میں دو اہلکار زخمی ہوئے۔ سیکیورٹی اداروں نے علاقے میں سرچ آپریشن شروع کر دیا۔
