وزیراعظم شہبازشریف نے صنعتوں کیلئے بجلی سستی کرنے کا اعلان کردیا۔
ملک کے بڑے ایکسپورٹرز اور نمایاں کاروباری شخصیات کے اعزاز میں منعقدہ پروقار تقریب میں وزیراعظم شہباز شریف نے قومی معیشت میں اہم خدمات انجام دینے والے ایکسپورٹرز کو ایوارڈز سے نوازا، اور اس موقع پر خطاب میں کہا کہ پاکستان کو ڈیفالٹ سے بچانے کے لیے عالمی مالیاتی اداروں، خاص طور پر آئی ایم ایف، کے ساتھ کیے گئے اپنے مذاکرات اور اقدامات کا بھی تذکرہ کیا۔ اس موقع پر نائب وزیراعظم اسحاق ڈار اور وفاقی وزرا کی بڑی تعداد بھی موجود تھی۔
تقریب سے خطاب میں وزیراعظم نے صنعتوں کیلئے بجلی کی قیمت میں 4روپے 4پیسے کمی کا اعلان کردیا، کہا 12 ارب روپے ماہانہ ریوینو آرہا ہے۔ انڈسٹری کیلئے ویلنگ چارجز 9 روپے سے کم ہوں گے۔
وزیراعظم نے کہا کہ عظیم کاروباری شخصیات نے ملک کا نام روشن کیا، ایکسپورٹرز پاکستان کے عظیم فرزند ہیں، کاروباری شخصیات نے مشکل حالات میں بہترین کام کیا، کاروباری شخصیات نے ملکی برآمدات میں نمایاں اضافہ کیا۔ نامور ایکسپورٹرز کو دو سال کا بلیو پاسپورٹ دیں گے۔
ان کا کہنا تھا کہ جب حکومت سنبھالی تو کچھ لوگوں نے کہا پاکستان ڈیفالٹ کرچکا ہے، ملک کو دیوالیہ ہونے سے بچانا ہمارے لیے چیلنج تھا، حکومت سنبھالی تو ملک کی معاشی صورتحال ابتر تھی، پاکستان کی معیشت اب مستحکم ہوچکی ہے، مہنگائی کی شرح سنگل ڈیجٹ میں ہے، حکومتی کاوشوں سے ملک دیوالیہ ہونے سے بچا۔
پاکستان ہوگا تو سیاست ہوگی، وزیراعظم
شہبازشریف نے کہا کہ مل کر پاکستان کو ترقی کی راہ پر گامزن کرنا ہوگا، سب سیاست کریں لیکن یاد رکھیں پاکستان ہوگا تو سیاست ہوگی۔ ان کا مزید کہنا تھا کہ گورنر اسٹیٹ بینک دل بڑا کریں اور تگڑے فیصلے کریں، گورنر اسٹیٹ بینک کاروباری شخصیات کی بات سنیں۔
تقریب سے خطاب میں وزیراعظم نے کہا کہ جو قرض لینے جاتا ہے اس کا سر جھکا ہوا ہوتاہے، دوست ممالک سے قرض لیے انہوں نے ہمیں مایوس نہیں کیا، کوئی کسی سے مانگنے جاتا ہے تو کمپرومائز کرنا پڑتا ہے، چین،سعودی عرب،قطر،متحدہ عرب امارات نے پاکستان کی مدد کی۔
شہبازشریف نے کہا کہ حکومتیں کاروبار نہیں کرتیں،کاروبار پرائیویٹ سیکٹر نے کرنا ہے، پی آئی اے کی انتہائی شفاف نجکاری ہوئی، حکومتی اخراجات کم کرنے کیلئے حقیر کوشش ہورہی ہے، حکومت کے اربوں روپے کے نقصانات ختم ہورہے ہیں، پی ڈبلیو ڈی انتہائی کرپٹ ادارہ تھا،بند کردیا، یوٹیلیٹی اسٹورز میں کرپشن تھی بند کردیا، پاسکو میں بھی کرپشن تھی اسے بھی بند کردیا۔
وزیراعظم نے کہا کہ جنگ میں پاکستان نے بھارت کو شکست فاش دی، پاکستان کی فتح کو بھارت کی آنے والی نسلیں بھی یاد رکھیں گی، جنگ میں فتح کے بعد پاکستان کا دنیا میں نمایاں مقام بن چکا ہے، جنگ میں فتح کے بعد عالمی دوروں کے دوران رویے تبدیل ہوتے دیکھے، پاکستان نے بھارت کے خلاف جنگ جیتی،اپنی دھاک بٹھادی۔
وزارت مواصلات کے ریونیو میں اربوں روپے اضافہ
انہوں نے کہا کہ کوئی شک نہیں کہ ٹیکسز کم ہونے چاہئیں، ایک سال میں 50 ارب روپے اضافی شوگر سیکٹر سے جمع کیے، عبدالعلیم خان نے گزشتہ سال وزارت مواصلات کے ریونیو میں اضافہ کیا، عبدالعلیم خان نے وزارت مواصلات کے ریونیو میں 60 ارب روپے اضافہ کیا۔ عبداالعلیم خان نے چوری اور لیکجز کم کرکے ریونیو میں 60 ارب روپے اضافہ کیا ہوا۔
