بنگلہ دیش نے انٹرنیشنل کرکٹ کونسل کو ایک اور خط لکھ کر ورلڈکپ وینیو کے معاملے پر نظرثانی کی درخواست کردی۔
غیرملکی ویب سائٹ کے مطابق بنگلہ دیش نے بھارت میں ٹی ٹوینٹی ورلڈکپ 2026 کھیلنے سے انکار کر دیاہے اور اپنے موقف پر ڈٹے رہنے کا فیصلہ سنا دیاہے اور آئی سی سی کو وینیو کے معاملے پر نظرثانی کی درخواست کردی۔
بنگلہ دیش نے سکیورٹی خدشات کے باعث آئندہ ٹی ٹوئنٹی ورلڈ کپ کیلئے بھارت نہ جانے کے فیصلے پر نظرِثانی کو یکسر مسترد کر دیا ہے۔ بنگلہ دیش کے یوتھ اینڈ اسپورٹس ایڈوائزر عاصف نذرال نے کہا ہے کہ اس فیصلے پر دوبارہ غور کی کوئی گنجائش نہیں۔
قومی کرکٹرز سے ملاقات کے بعد میڈیا سے گفتگو کرتے ہوئے عاصف نذرال کا کہنا تھا کہ انٹرنیشنل کرکٹ کونسل (آئی سی سی) نے بنگلہ دیش کے ساتھ اس معاملے میں انصاف نہیں کیا اور میچز کی منتقلی کی درخواست کو نظرانداز کیا۔
عاصف نذرال نے کہا کہ بنگلہ دیش کو اب بھی توقع ہے کہ آئی سی سی اس معاملے میں انصاف کو یقینی بنائے گی، سکیورٹی صورتحال کے پیش نظر ٹیم کو بھارت بھیجنا ممکن نہیں۔
دوسری جانب ٹی ٹونٹی ورلڈ کپ کے بائیکاٹ پر بنگلہ دیش کو بھاری مالی نقصان کا سامنا کرنا پڑسکتا ہے۔ بھارتی میڈیا کے مطابق ورلڈ کپ میں شرکت نہ کرنے پر بنگلہ دیش کو 325 کروڑ ٹکا کا نقصان ہوگا۔ بنگلہ دیش کرکٹ بورڈ (بی سی بی) کو سالانہ آمدن کی کمائی کے تقریباً 60 فیصد، براڈکاسٹ اور سپانسر شپ کی مد میں ہونے والی آمدن سے بھی ہاتھ دھونا پڑ سکتا ہے۔
