پاکستان اور سری لنکا کے درمیان ٹی ٹوئنٹی سیریز کی ٹرافی کی رونمائی کر دی گئی۔ تقریب میں پاکستان کے کپتان سلمان آغا اور سری لنکن کپتان داسن شناکا نے ٹرافی کی نقاب کشائی کی۔
اس موقع پر گفتگو کرتے ہوئے سلمان آغا نے کہا کہ پاکستان ٹیم کو ورلڈکپ سے قبل سری لنکا میں میچز کھیلنے کا موقع مل رہا ہے جو تیاری کے لیے نہایت اہم ہے۔ ان کا کہنا تھا کہ سری لنکا میں کھیل کر ٹیم ورلڈکپ کی بہتر تیاری اور کنڈیشنز سے ہم آہنگ ہو سکے گی۔
سلمان آغا نے کہا کہ بابر اعظم، شاہین آفریدی اور محمد رضوان میگا اسٹارز ہیں اور پاکستان کرکٹ کے لیے ان کی بے شمار خدمات ہیں۔ انہوں نے بتایا کہ اس ٹی ٹوئنٹی سیریز میں پاکستان کے مستقبل کے کھلاڑیوں کو آزمانے کا موقع دیا جائے گا۔
کپتان کا کہنا تھا کہ خواجہ نافع ایک اچھے بیٹسمین ہیں اور وکٹ کیپنگ بھی بہتر انداز میں کرتے ہیں، امید ہے وہ ڈومیسٹک کرکٹ جیسی کارکردگی یہاں بھی دہرائیں گے۔ سلمان آغا نے مزید کہا کہ پاکستان ٹیم ایک مضبوط کمبی نیشن کے ساتھ میدان میں اترے گی اور سیریز جیت کر واپس آنے کی امید ہے۔
انہوں نے بتایا کہ کھلاڑی انٹرنیشنل ٹی ٹوئنٹی لیگز میں اچھی کارکردگی کے بعد ٹیم میں شامل ہوئے ہیں اور توقع ہے کہ وہ اسی تسلسل کو برقرار رکھیں گے۔ شاہین شاہ آفریدی کے حوالے سے سلمان آغا نے کہا کہ ان کا نیشنل کرکٹ اکیڈمی میں ری ہیب جاری ہے اور امید ہے وہ ورلڈکپ سے پہلے مکمل فٹ ہو جائیں گے۔
سلمان آغا کے مطابق شاداب خان طویل انجری کے بعد واپس آئے ہیں اور انہوں نے بگ بیش لیگ میں اچھی پرفارمنس دی ہے۔ انہوں نے کہا کہ ٹیم میں موجود تمام اسپنرز آل راؤنڈرز ہیں اور انہیں ایک ساتھ مینج کرنا ایک چیلنج ضرور ہوگا، تاہم ٹیم اس کے لیے تیار ہے۔
