بلدیہ رئیس گوٹھ سے دو ہزار کلو گرام دھماکہ خیز مواد برآمد ہونے کے واقعے کا مقدمہ درج کرلیا گیا۔ سی ٹی ڈی حکام کے مطابق مقدمہ سرکاری مدعیت میں محکمہ انسداد دہشت گردی (سی ٹی ڈی) میں درج کیا گیا ہے۔
ایف آئی آر کے مطابق مقدمے میں انسداد دہشت گردی ایکٹ اور ایکسپلوسِو ایکٹ کی دفعات شامل کی گئی ہیں جبکہ کالعدم تنظیم بی ایل اے کے کمانڈر بشیر زیب اور اس کے ساتھیوں کو نامزد کیا گیا ہے۔
ایف آئی آر کے متن میں بتایا گیا ہے کہ خفیہ اطلاعات پر رئیس گوٹھ میں ایک گھر پر چھاپہ مارا گیا، جہاں کارروائی کے دوران ملزم جلیل عرف نوید کو گرفتار کرلیا گیا جبکہ اس کے ساتھی فرار ہونے میں کامیاب ہوگئے۔
کارروائی کے دوران کمپاؤنڈ کے اندر منی ٹرک موجود تھا جس میں پلاسٹک کے ڈرم اور سلنڈر رکھے گئے تھے۔ حکام کے مطابق ٹرک کے اندر موجود دھماکہ خیز مواد ڈیٹونیٹرز اور ڈیڈ کور وائر سے منسلک تھا۔
فارنزک ٹیسٹ کے بعد تصدیق ہوئی کہ برآمد ہونے والا بارودی مواد 2000 کلو گرام ہے۔ ایف آئی آر میں انکشاف کیا گیا ہے کہ گرفتار اور مفرور ملزمان کا تعلق کالعدم بی ایل اے کی مجید بریگیڈ (فتنۃ الہندوستان) سے ہے۔
حکام کے مطابق منی ٹرک کو تیار کرنے کا مقصد کراچی میں بڑی دہشت گردی کی کارروائی کرنا تھا۔
