چولستان یونیورسٹی آف ویٹرنری اینڈ اینیمل سائنسز بہاولپور کے طلبہ و طالبات نے پاک فوج کے زیرِ اہتمام ایک معلوماتی اور یادگار دورہ کیا، جس کے دوران انہیں دفاعی امور سے متعلق عملی آگاہی فراہم کی گئی۔
اس موقع پر طلبہ نے خیرپور ٹامیوالی فائرنگ رینج کا دورہ کیا، جہاں ٹینک فائر، جدید ہتھیاروں کے عملی مظاہرے اور عسکری سازوسامان کا براہِ راست مشاہدہ کروایا گیا۔ طلبہ کو پاک فوج کی پیشہ ورانہ مہارت، جدید دفاعی صلاحیتوں اور جنگی تیاریوں کے مختلف پہلوؤں سے تفصیلی طور پر آگاہ کیا گیا۔
طلبہ و طالبات نے پاک فوج کی اعلیٰ تربیت، نظم و ضبط اور پیشہ ورانہ صلاحیتوں کو سراہتے ہوئے اس تجربے کو نہایت متاثر کن قرار دیا۔ اس موقع پر انہوں نے معرکۂ حق (آپریشن بنیان المرصوص) کی تاریخی فتح پر خراجِ تحسین پیش کیا اور پاک فوج کے ساتھ مکمل یکجہتی کا اظہار کیا۔
طلبہ و طالبات نے قومی ترقی اور ملکی دفاع کے لیے اپنا بھرپور کردار ادا کرنے کے عزم کا اعادہ کیا۔
