پاکستان ٹیسٹ ٹیم کے کپتان شان مسعود نے انضمام الحق کا 33 سالہ پرانا ریکارڈ توڑ دیا۔
پاکستان ٹیسٹ ٹیم کے کپتان شان مسعود نے فرسٹ کلاس کرکٹ میں ایک نیا سنگ میل عبور کرتے ہوئے سابق لیجنڈری کپتان انضمام الحق کا دیرینہ ریکارڈ توڑ دیا ہے،شان مسعود نے پاکستان کی تاریخ کی تیز ترین فرسٹ کلاس ڈبل سنچری اسکور کرنے کا اعزاز اپنے نام کر لیا ہے۔
پریذیڈنٹ ٹرافی گریڈ ون کے ایک میچ میں ایس این جی پی ایل (SNGPL) کی نمائندگی کرتے ہوئے شان مسعود نے ساحر ایسوسی ایٹس کے خلاف جارحانہ بیٹنگ کا مظاہرہ کیا اور محض 177 گیندوں پر اپنی ڈبل سنچری مکمل کی۔ اس سے قبل یہ اعزاز انضمام الحق کے پاس تھا، جنہوں نے 1992 میں آکسفورڈ اینڈ کیمبرج یونیورسٹی کے خلاف 188 گیندوں پر ڈبل سنچری بنائی تھی۔
شان مسعود کی یہ اننگز ناصرف کسی پاکستانی کی تیز ترین ڈبل سنچری ہے، بلکہ یہ پاکستانی سرزمین پر بھی تیز ترین فرسٹ کلاس ڈبل سنچری قرار پائی ہے۔ اس سے قبل 2006 میں بھارتی بلے باز وریندر سہواگ نے لاہور ٹیسٹ کے دوران 182 گیندوں پر ڈبل سنچری بنائی تھی۔ شان مسعود کی اس شاندار کارکردگی نے سڈنی ٹیسٹ سے قبل ان کے اعتماد میں بے پناہ اضافہ کر دیا ہے۔
