پی ٹی آئی سیکرٹری جنرل سلمان اکرم راجا نے کہاہے کہ اگرچہ ہم اس پارلیمان کو نہیں مانتے لیکن جو کچھ ہو رہا ہے اس پر پارلیمان کو اعتماد میں بھی نہیں لیا گیا۔ ہم کسی دہشتگرد سے ڈائیلاگ کی بات نہیں کرتے ہیں ۔ بس یہ مطالبہ ہے کہ خطے میں گرینڈ ڈائیلاگ ہو جس میں قومی رہنماؤں سمیت سعودی عرب، ترکی اور افغان حکومت کو بھی شامل کیا جائے۔
اڈیالہ روڈ داہگل ناکہ پر میڈیا سے گفتگو میں سلمان اکرم راجہ کا کہنا تھا کہ دو برادر مسلمان ممالک کے درمیان جنگ افسوس کا مقام ہے۔ پارلیمان کو اعتماد میں نہیں لیا جاتا اور جہاں کہیں بھی فیصلے ہو رہے ہیں قوم ان کو نہیں جانتی ۔ نظر آرہا ہے کہ یہ خطہ آئندہ بے امنی کا ہی شکار رہے گا۔ ہمیں دانائی کا ثبوت دیتے ہوئے سارے معاملے کو سیاسی بصیرت کے ساتھ اور بڑے معاشی پروگرام کے تحت حل کرنا ہوگا۔۔ سلمان اکرم راجا نے کہا کہ بانی پی ٹی آئی سے ملاقات کے لئے ہمارے پاس قانونی حق اور عدالتی فیصلے موجود ہیں۔ ہم نے حملہ نہیں کرنا نہ پتھر مارنے ہیں۔ ہم نے ہمیشہ کہا کہ اصول کی سطح پر گفتگو کرنے کو تیار ہیں ۔ اگر کہا جائے کہ آٹھ فروری کے الیکشن پر مٹی ڈال کر آگے بڑھیں تو یہ نہیں ہوگا۔ اچکزئی صاحب اور علامہ ناصر عباس کو بانی نے مکمل اختیار دیا ہے ۔ ان دونوں کو اپوزیشن لیڈر بھی بنایا ہے وہ صحیح فیصلہ کریں گے۔
