اسلام آباد: پاکستان انٹرنیشنل ایئرلائنز (پی آئی اے) کے 75 فیصد شیئرز کی نجکاری کے لیے بڈنگ کامیابی سے مکمل ہو گئی۔ اس موقع پر وزیراعظم شہباز شریف نے کامیاب بولی کے انعقاد پر اظہارِ تشکر کرتے ہوئے قوم کو مبارکباد دی۔
وزیراعظم شہباز شریف نے کہا کہ ہم نے وعدہ کیا تھا کہ ریاستی ملکیتی اداروں کی نجکاری کے لیے عملی اقدامات اٹھائے جائیں گے اور پی آئی اے کی نجکاری کا یہ عمل اس حوالے سے ایک انتہائی اہم سنگِ میل ہے۔ انہوں نے کہا کہ الحمدللہ، بولی کا پورا عمل شفاف رہا۔
وزیراعظم کا کہنا تھا کہ پی آئی اے اور دیگر ریاستی ملکیتی اداروں کی نجکاری ملکی معیشت میں اہم کردار ادا کرے گی اور اس اقدام سے سرمایہ کاروں کا اعتماد بحال ہوا ہے، جس کا واضح ثبوت پی آئی اے کی کامیاب نجکاری ہے۔
انہوں نے کہا کہ ہم اللہ تعالیٰ کا شکر ادا کرتے ہیں کہ تمام ریاستی اداروں کے باہمی تعاون سے ملکی معیشت بتدریج مستحکم ہو رہی ہے۔ وزیراعظم شہباز شریف نے نائب وزیراعظم اسحاق ڈار، فیلڈ مارشل عاصم منیر اور دیگر متعلقہ افراد کی کوششوں کو لائقِ تحسین قرار دیا۔
وزیراعظم نے مزید کہا کہ حکومت نجی شعبے کے اشتراک سے ملکی ترقی، خوشحالی اور عوامی فلاح و بہبود کے لیے پُرعزم ہے۔
