اٹلی میں پنشن فراڈ کا حیران کن واقعہ سامنے آیا ہے جہاں ایک 57 سالہ شخص کو اس وقت گرفتار کر لیا گیا جب وہ اپنی مردہ ماں کا روپ دھار کر شناختی کارڈ کی تجدید کروانے کی کوشش کر رہا تھا، غیر ملکی میڈیا کے مطابق واقعہ شمالی اٹلی میں پیش آیا۔
حکام کا کہنا ہے کہ ملزم کے گہرے بالوں والے ہاتھ، ٹھوڑی اور گردن نے اہلکاروں کو شک میں ڈال دیا جس کے بعد معاملے کی تفتیش کی گئی۔ ملزم کی والدہ 2022 میں 82 سال کی عمر میں انتقال کر چکی تھیں لیکن بیٹے نے ان کی موت کی اطلاع حکام کو نہیں دی تھی اور ان کی پنشن وصول کرتا رہا۔
اٹلی میں شناختی کارڈ کی تجدید کیلئے شہری کو خود دفتر جانا پڑتا ہے۔ جب کارڈ کی میعاد ختم ہوئی تو بیٹے نے میک اپ، وِگ اور ماں کے کپڑے پہن کر ان کا روپ اختیار کیا، تاہم اہلکار نے مشکوک رویہ دیکھ کر پولیس کو اطلاع دی۔مزید تحقیقات میں سی سی ٹی وی فوٹیج سے انکشاف ہوا کہ ’خاتون‘ خود گاڑی چلا کر دفتر آئی تھیں جبکہ مرنے والی خاتون کے پاس ڈرائیونگ لائسنس موجود ہی نہیں تھا۔
پولیس کی جانب سے گھر کی تلاشی کے دوران خاتون کی ممی شدہ لاش لانڈری روم سے برآمد ہوئی، جو سلیپنگ بیگز میں لپٹی ہوئی تھی۔ملزم کے خلاف لاش چھپانے، ریاست سے دھوکہ دہی اور سرکاری دستاویز میں جعل سازی کا مقدمہ درج کر لیا گیا ہے۔
رپورٹس کے مطابق اٹلی میں پنشن فراڈ عام ہے اور ہر سال درجنوں افراد مردہ رشتہ داروں کا روپ دھار کر پنشن وصول کرتے ہوئے پکڑے جاتے ہیں، جبکہ ملک میں ریکارڈ سسٹمز ہم آہنگ نہ ہونے کے باعث بعض کیسز میں پنشن سالوں تک جاری رہتی ہے۔
