وفاقی وزیرمواصلات عبدالعلیم خان کا کہنا ہے کہ پاکستان خطے میں روابط اور معاشی ترقی کیلئے کوشاں ہے۔ علاقائی تجارت میں اضافہ خطے کی ترقی کیلئے ناگزیر ہے۔ گوادربندرگاہ علاقائی تجارت کا مرکز بننے کی مکمل صلاحیت رکھتی ہے۔
اسلام آباد میں ریجنل ٹرانسپورٹ منسٹرز کانفرنس سے خطاب میں وفاقی وزیر مواصلات عبدالعلیم خان نے کہا کہ کانفرنس نے روابط کے فروغ کے حوالے سے تبادلہ خیال کا موقع فراہم کیا، کانفرنس علاقائی روابط کوفروغ دینے کے مشترکہ عزم کی عکاس ہے۔
وفاقی وزیرمواصلات عبدالعلیم خان نے کہا کہ کانفرنس میں شرکت کرنے والے ممالک کے وزراکے شکر گزار ہیں۔
قبل ازیں ترکیہ، سعودی عرب اور سری لنکا کے وزرائے ٹرانسپورٹ و مواصلات نے وفاقی وزیر عبدالعلیم خان سے الگ الگ ملاقاتیں کیں۔ علاقائی لاجسٹک شراکت داری، کاروباری تعاون اور ٹرانسپورٹ رابطوں کے فروغ پر اتفاق کیا گیا۔ وفاقی وزیر نے اپنے ہم منصبوں کو پاکستان کے مکمل تعاون کی یقین دہانی کرائی۔
ترکیہ ترکیہ کے وزیر ٹرانسپورٹ و انفراسٹرکچر عبدالقادر اوغلو سے ملاقات میں عبدالعلیم خان نے کہا کہ پاکستان، ترکیہ کے ساتھ لاجسٹک پارٹنر شپ چاہتا ہے اور این ایل سی کے ذریعے شراکت داری ممکن ہے۔
ترکیہ کے وزیر نے پاکستان میں معاشی شراکت داروں کے ساتھ مل کر کام کرنے کے عزم کا اظہار کیا۔ ملاقات میں دو طرفہ کاروباری روابط بڑھانے پر اتفاق ہوا جبکہ چیئرمین این ایچ اے کو پاک ترکیہ مواصلاتی امور کے لیے فوکل پرسن مقرر کیا گیا۔
سعودی عرب کے ڈپٹی سینٹر برائے مواصلات ڈاکٹر رومح ال رومح نے عبدالعلیم خان سے ملاقات کی، جس میں پاکستان اور سعودی عرب کے مضبوط تعلقات کو اعزاز قرار دیا گیا۔ سعودی نائب ڈپٹی سینیٹر نے وفاقی وزیر کو اپنے ملک کے دورے کی دعوت بھی دی۔
