اسلامی نظریاتی کونسل کی جانب سے جاری وضاحتی اعلامیے میں کہا گیا ہے کہ ود ہولڈنگ ٹیکس غیر شرعی قرار دینے پر حتمی رائے نہیں دی۔ اجلاس میں چند ارکان نے معاملے پر ابتدائی بحث کی جس میں مختلف آرا سامنے آئیں، کوئی فیصلہ نہیں ہوا۔
بینک سے رقم نکالنے یا منتقل کرنے پر لگنے والا ود ہولڈنگ ٹیکس غیر شرعی ہے یا نہیں؟ اسلامی نظریاتی کونسل نے پہلے غیر شرعی ہونے کا اعلامیہ جاری کیا بعد وضاحت میں نیا مؤقف دے دیا۔
کونسل کا کہنا ہے ودہولڈنگ ٹیکس سے متعلق حتمی رائے قائم کرنے کی بات درست نہیں۔ اس معاملے پر کوئی فیصلہ نہیں ہوا۔ اجلاس میں اراکین کی مختلف آرا سامنے آئی،جس پر اگلے اجلاس میں ماہرین سے مشاورت کرنے کا کہا گیا ہے، آئندہ اجلاس میں اس حوالے سے سیر حاصل بحث كی جائےگی۔
اسلامی نظریاتی کونسل نے عورت کو رخصتی سے پہلے طلاق کی صورت میں عدت اور نان و نفقہ کی ادائیگی لازم قرار دینے کا سپریم کورٹ کا فیصلہ بھی قرآن و سنت کے خلاف قرار دے دیا۔
اعلامیے کے مطابق انسانى دودھ بینک كے قیام کی مشروط اجازت بھی دے دی گئی ۔ کہا گیا کہ اس معاملے میں مفاسد سے بچاؤ کیلئے پہلے لازمی قانون سازی کی جائے اوراس میں کونسل کو شامل کیا جائے۔
ڈاکٹر راغب نعیمی کی زیرصدارت اجلاس میں دیت کے قانون میں ترمیم کیلئے پیش بل مسترد کردیا گیا۔ کونسل نے قرار دیا بل میں چاندی کو حذف اور سونے کی غیرشرعی مقدار کو معیار بنایا گیا۔ دیت کی شرعی مقداریں یعنی سونا، چاندی اور اونٹ قانون میں شامل رکھی جائیں ۔
شوگر کے مریضوں کیلئے خنزیر کے اجزا پر مشتمل انسولین کے معاملے پر کونسل نے یہ بھی واضح کردیا کہ حلال اجزا والی انسولین دستیاب ہو تو شوگر کے مریضوں کیلئے خنزیر کے اجزا پر مشتمل انسولین سے پرہیز کیا جائے۔
