وزیراعلیٰ پنجاب مریم نوازشریف نے جدید ترین الیکٹرو بس پراجیکٹ کا افتتاح کر دیاہے ، ماحول دو ست اور گرین پاکستان الیکٹروبسیں ساہیوال پہنچاد ی گئیں ہیں، ساہیوال الیکٹرو بس سروس میں ہر سٹاپ کا کرایہ 20روپے مقررکیا گیاہے ۔
تفصیلات کے مطابق وزیراعلیٰ مریم نوازنے ساہیوال میں الیکٹرو بس سروس پر سفر کیا، وزیراعلیٰ کی آمد پر ساہیوال میں جوش و خروش دیکھا گیا، عوام نے ساہیوال میں الیکٹروبس سروس کے آغاز پر زبردست مسرت کا اظہار کیا ، ہزاروں نوجوان ساہیوال کی پہلی الیکٹرک بس کیساتھ ساتھ چلتے رہے، عوام نے ساہیوال الیکٹرو بس پر پھولوں کی پتیاں نچھاور کیں ، وزیراعلیٰ مریم نوازای بس پر سوارہوکر تقریب کے مقام پہنچیں۔
وزیرٹرانسپورٹ پنجاب بلال اکبر نے ای بس منصوبے بارے تفصیلات سے آگاہ کیا، ساہیوال میں پہلے مرحلے میں 16 الیکٹرک بسیں چلائی جائیں گی، ساہیوال میں الیکٹروبسیں ابتدائی طور پر 4 روٹس پر چلائی جائیں گی، الیکٹرو بس کا پہلا روٹ عارف والا بائی پاس سے سرور چوک تک ہوگا، نورشاہ تا کے ایف سی بائی پاس بھی الیکٹرک بس چلے گی ، فرید ٹاؤن سے یوسف والا تک الیکٹرو بس کا تیسرا روٹ ہے ، جنرل بس سٹینڈ تا کمیر بھی الیکٹروبس چلائی جائے گی ، ساہیوال الیکٹرو بس پر25ہزار سے زائد مسافر روزانہ سفر کریں گے۔
ساہیوال الیکٹرو بس سروس میں ہر سٹاپ کا کرایہ 20روپے مقرر کیا گیاہے ، الیکٹروبس میں وائی فائی، موبائل چارجنگ اورسی سی ٹی وی کیمرے نصب ہوں گے، ساہیوال الیکٹرک بس سروس میں خواتین کیلئے الگ کمپارٹمنٹ مختص کیا گیاہے ، الیکٹرو بس کیلئے ساہیوال میں چارجنگ سٹیشن بھی قائم کر دیئے گئے۔
