اسلام آباد ہائی کورٹ نے نیب ایف آئی اے اور پولیس سے بانی پی ٹی آئی کے خلاف مقدمات کی تفصیلات طلب کر لیں۔
اسلام آباد ہائیکورٹ کے جسٹس اعظم خان نے بانی پی ٹی آئی کے خلاف مقدمات کی تفصیلات کیلئے درخواست پر سماعت کی ۔ دوران سماعت بانی پی ٹی آئی کی بہنیں بھی عدالت میں موجود تھیں ۔ بانی پی ٹی ائی کے وکیل سلمان صفدر نے دلائل دیئے کہ دو سال قبل درخواست دائر کی تھی ۔اس وقت اداروں کو بانی اور پی ٹی ائی کے خلاف استعمال کیا جا رہا تھا ۔ دو سال بعد بھی کوئی تبدیل نہیں آئی۔
بیرسٹر سلمان صفدر نے کہا کہ بانی پی ٹی آئی کے خلاف مقدمات کی صحیح تعداد معلوم کرنے کے لیے فریقین سے تفصیلات طلب کی جائیں ۔ اس کیس کی سماعت کے لیے لارجر بینچ تشکیل دیا جائے ۔ ماضی میں بھی تین کیسز میں لارجر بینچ تشکیل دیا گیا۔
اسپیشل پروسیکیوٹر نیب رافع مقصود نے کہا مقدمات کی تفصیلات فراہم کر دیتے ہیں۔ درخواست میں ایسا کوئی گراؤنڈ نہیں جس کی بنا پر لارجربینچ تشکیل دیا جائے ۔ عدالت نے ریمارکس دیئے مقدمات کی تفصیلات ملنے کے بعد لارجر بینچ کے حوالے سے فیصلہ کیا جائے گا۔ جسٹس اعظم خان نے پولیس ، ایف ائی اے اور نیب سے مقدمات کی تفصیلات طلب کرتے ہوئے سماعت ملتوی کر دی۔
