ڈاکٹرعافیہ صدیقی کی رہائی سےمتعلق درخواست پراہم پیشرفت سامنے آئی ہے،جہاں اسلام آباد ہائیکورٹ نے کیس کو 10 ستمبر کے لیے سماعت کے لیے مقرر کرتے ہوئے کاز لسٹ جاری کر دی۔
اسلام آباد ہائیکورٹ میں اس معاملے میں وزیراعظم اور کابینہ کے خلاف عدالتی حکم عدولی پر توہین عدالت کےنوٹس بھی زیربحث ہیں،عدالت نے کیس کی سماعت کے لیے 4 رکنی لارجر بینچ تشکیل دے دیا ہے جس کی سربراہی جسٹس ارباب محمد طاہر کریں گے۔
بینچ میں جسٹس خادم سومرو،جسٹس اعظم خان اور جسٹس انعام امین منہاس شامل ہیں، جسٹس انعام امین منہاس نے لارجر بینچ کے لیےفائل چیف جسٹس کو بھیجی تھی،اس سے قبل کیس جسٹس سردار اعجاز اسحاق خان کی عدالت میں زیر سماعت تھا۔جسٹس اعجاز اسحاق نے وزیراعظم اور کابینہ ارکان کو نوٹسز جاری کیے تھے۔
جسٹس اعجاز اسحاق کو ٹیکس کیسز کے لیے اسپیشل ڈویژن بینچ کا حصہ بنایا گیا،اسپیشل ڈویژن بینچ بننے کے باعث سنگل بینچ کے کیسز ٹرانسفر کردیے گئے تھے۔
