میکسیکو کی ایک ٹک ٹاک انفلوئنسر اسمارالڈا فیریر گاریبے کو ان کے شوہر اور 2 بچوں سمیت قتل کردیا گیا، لاشیں پلاسٹک میں لپیٹ کر پک اپ ٹرک میں پینک دی گئیں۔
جنوبی امریکی ملک میکسیکو کے شہر گوادالاجارا میں ٹک ٹاک انفلوئنسر اسمارالڈا فیریر گاریبے، ان کے شوہر اور 2 بچوں کو گولیاں مار کر قتل کیا گیا، چاروں لاشوں کو پلاسٹک میں لپیٹ کر خالی گرے فورڈ پک اپ ٹرک کے اندر پھینک دیا گیا۔
غیر ملکی میڈیا کی رپورٹ کے مطابق پراسیکیوٹر الفونسو گیٹرز سانتیان نے بتایا کہ سی سی ٹی وی فوٹیج کے ذریعے ٹرک کا راستہ قریب ہی واقع ایک آٹو ورکشاپ تک ٹریس کیا گیا، قتل اسی مقام پر کیا گیا تھا، جہاں خون کے دھبے، فائر کی گئی گولیوں کے خول اور دیگر شواہد ملے۔
رپورٹ کے مطابق ابتدائی طور پر اس ورکشاپ کے 2 ملازمین کو گرفتار کیا گیا، تاہم ثبوتوں کی کمی کی وجہ سے انہیں ضمانت پر چھوڑ دیا گیا، حیرت انگیز طور پر، چند منٹ بعد وہ دونوں مسلح افراد کے ہاتھوں اغوا ہوگئے، جس میں ان کے 2 رشتہ دار بھی شامل تھے جبکہ ایک بچ نکلا۔
غیر ملکی میڈیا کے مطابق حملہ مسلح افراد کے گروہ نے منصوبہ بندی کے ساتھ انجام کیا، جس سے اس واقعے کی منظم نوعیت کا پتہ چلتا ہے، حالانکہ کوئی واضح ثبوت اس بات کی تصدیق نہیں کرتا کہ اسمارالڈا یا ان کے شوہر کارٹل کا حصہ تھے۔
