وفاقی ادارہ شماریات نے کہاہے کہ پاکستان کی برآمدات میں جولائی 2025 میں 16.43 فیصد اضافہ ریکارڈ کی گیاہے جس کے بعد حجم 2.68 ارب ڈالر ہو گیاہے ۔
ادارہ شماریات کے مطابق ٹیکسٹائل برآمدات 32 فیصد اضافے سے ایک ارب 67 کروڑ ڈالر رہا، ریڈی میڈ گارمنٹس، سوتی دھاگا، کپڑے، نیٹ ویئر،بیڈویئر،ٹاؤلزکی ایکسپورٹ بڑھی ہے ، ٹینٹ، کینوس، ترپال وغیرہ کی برآمدات میں کمی ریکارڈ کی گئی، غذائی اجناس کی برآمدات میں 10.25 فیصد کمی ہو ئی اور حجم 42 کروڑ 69 لاکھ ڈالرریکارڈ کیا گیا ۔
دستاویز کے مطابق گزشتہ مالی سال اسی مدت میں غذائی برآمدات 47 کروڑ 57 لاکھ ڈالر تھیں، جولائی میں باسمتی چاول، سبزیوں،آئل سیڈز، چینی کی برآمدات میں کمی رہی، پھلوں، مصالحہ جات، گوشت اوراس کی مصنوعات کی برآمدات میں اضافہ ہوا، آٹو پارٹس، لیدر مصنوعات،سرجیکل آلات کی ایکسپورٹ میں بھی اضافہ ہوا ، پلاسٹک میٹریل، ادویات اور ٹرانپسورٹ کے سامان کی برآمدات میں کمی آئی ہے، پیٹرولیم اورکوئلے کی برآمدات میں 23.37 فیصد کمی ہوئی جس کے بعد حجم 4 کروڑ 88 لاکھ ڈالررہا، مخصوص صنعتوں کی برآمدات میں سالانہ بنیاد پر 17.35 فیصد کمی آئی ہے۔
