کراچی میں اورنگی ٹاؤن مومن آباد میں تین منزلہ خستہ حال عمارت گرگئی، 7 افراد کو ملبے سے نکال لیا گیا، امدادی کارروائیاں جاری ہیں۔
کراچی کے علاقے اورنگی ٹاؤن مومن آباد میں شدید بارشوں کے بعد تین منزلہ خستہ حال رہائشی عمارت گرگئی، کئی افراد ملبے میں دب گئے، ریسکیو آپریشن جاری ہے۔
ایس ایس پی ویسٹ طارق مستوئی کا کہنا ہے کہ خستہ حال مکان میں سیاسی جماعت اے این پی کا دفتر قائم تھا، متاثرہ مکان میں کسی کی رہائش نہیں تھی، زخمی اے این پی کے ورکرز ہیں جو دفتر میں موجود تھے۔
انہوں نے بتایا کہ پنکھے کا سوئچ آن کیا گیا تو زور دار دھماکے سے مکان گرگیا، شبہ ہے مکان میں گیس لیکیج تھی، مزید تحقیقات جاری ہیں، جلد حقائق سامنے آجائیں گے، بم ڈسپوزل اسکواڈ اور کرائم سین یونٹ موقع پر طلب کرلیا گیا ہے۔
ریسکیو حکام کے مطابق ملبے سے 7 زخمیوں کو نکال لیا گیا، ایک شخص آگ سے جھلس کر جبکہ باقی افراد ملبے میں دب کر زخمی ہوئے۔
ریسکیو حکام کے مطابق زخمیوں کو عباسی شہید اسپتال اور سول اسپتال برنس وارڈ منتقل کیا جارہا ہے۔
امدادی ٹیموں کے مطابق ملبے میں مزید افراد کے دبے ہونے کا بھی خدشہ ہے۔
