انسداد دہشت گردی عدالت نے 9 مئی کے واقعات سے متعلق کلمہ چوک اور نیشنل پارک گلبرگ کے سامنے کنٹینر جلانے کے دو مقدمات میں پاکستان تحریک انصاف کی رہنما ڈاکٹر یاسمین راشد کی ضمانت کی درخواستیں مسترد کر دیں۔
عدالت نے درخواستیں مسترد کرنے کی وجہ وکلا کی جانب سے مسلسل عدم پیروی کو قرار دیا ہے۔
انسداد دہشت گردی عدالت کے جج ارشد جاوید نے کوٹ لکھپت جیل میں مقدمات کی سماعت کی۔
سماعت کے دوران ڈاکٹر یاسمین راشد کے وکلا درخواست ضمانت پر دلائل دینے کے لیے پیش نہیں ہوئے جس کے باعث عدالت نے دونوں درخواستوں کو خارج کر دیا۔
واضح رہے کہ ڈاکٹر یاسمین راشد پر 9 مئی کے واقعات میں کلمہ چوک اور نیشنل پارک گلبرگ کے سامنے کنٹینر جلانے کے الزامات کے تحت مقدمات درج ہیں۔
