خیبر پختونخوا حکومت نے کلاؤڈ برسٹ اور فلش فلڈ کے متاثرین کے لئے سیلاب زدگان فنڈز قائم کردیا۔وزیر اعلی علی امین گنڈا پور نے ایک ماہ کی جبکہ کابینہ ممبران نے پندرہ دنوں کی تنخواہیں سیلاب زدگان کو دینے کا فیصلہ کرلیا ہے۔
خیبر پختونخوا کے مختلف اضلاع میں حالیہ سیلاب متاثرین کے لئے امدادی فنڈز میں ممبران صوبائی اسمبلی سات دن کی تنخواہ جمع کرائیں گے۔گریڈ 17 سے اوپر کے صوبائی سرکاری ملازمین دو دن جبکہ گریڈ 16 تک کے ملازمین ایک دن کی تنخواہ سیلاب زدگان کے لئے جمع کرائیں گے۔وزیر اعلی علی امین گنڈا پور نے کہا کہ ان عطیات کے شفاف استعمال کے لئے بھی طریقہ کار وضع کیا جائے گا جبکہ اس مقصد کے لئے پی ڈی ایم اے میں ایک خصوصی اکاونٹ کھولا جائے گا۔
وزیر اعلی نے کہا کہ سیلاب زدگان کی امداد کے لئے اس فنڈ کے استعمال کے لئے ایک صاف اور شفاف طریقہ کار اپنایا جائے گا، اس فنڈ کے ایک ایک پائی کا حساب رکھا جائے گا اور اس کی تمام تفصیلات سے عوام کو آگاہ کیا جائے گا۔علی امین نے کہا کہ سیلاب زدگان ہماری خصوصی توجہ اور تعاون کے مستحق ہیں اور مشکل کی اس گھڑی میں ہم سب کو دل کھول کر متاثرین کی مدد کرنی چاہیے۔
