وفاقی وزیر ریلوے حنیف عباسی نے ریلوے کے افسران کو وارننگ جاری کی ہے کہ سیفٹی معاملات بہتر بنالیں یا ریٹائرمنٹ لے لیں۔
اتوار کو وزیر ریلوے حنیف عباسی کی زیر صدارت ریلوے ہیڈ کوارٹرز لاہور میں ہنگامی اجلاس ہوا جس میں ٹرین آپریشن کے سیفٹی اقدامات پر تفصیلی بریفنگ دی گئی ۔
اجلاس سے خطاب کرتے ہوئے وفاقی وزیر نے ٹرین ڈیریلمنٹس کے واقعات پر اظہار برہمی کیا۔
حنیف عباسی کا کہنا تھا کہ نا اہل اور ایئرکنڈیشنر کمروں تک محدود افسران کو ریلوے میں رہنے کوئی حق نہیں اور سیفٹی پر کوئی سمجھوتا نہیں کروں گا۔
انہوں نے کہا کہ غفلت کرنے والوں کے خلاف میرا کُھلا اعلانِ جنگ ہے اور وارننگ دیتا ہوں کہ سیفٹی معاملات کو بہتر بنا لیں یا ریٹائرمنٹ لے لیں ، سسٹم سے ڈمی کوچز نکالیں ، چاہے اس کیلئے کوئی ٹرین بند ہی کیوں نہ کرنی پڑے ۔
ان کا کہنا تھا کہ ویجیلنس کے شعبہ کو تمام ضروری سہولیات فراہم کی جائیں اور ٹرین ڈرائیورز کے ہاتھ میں گیارہ سو مسافروں کی جان ہے انہیں ریفریشر کورس کروائیں۔
