آرمی چیف فیلڈ مارشل عاصم منیر نے برسلز میں سینئر صحافی سہیل وڑائچ سے گفتگو کرتے ہوئے کہا کہ تبدیلی کے بارے میں افواہیں سراسر جھوٹ ہیں، افواہیں پھیلانے والے حکومت اور مقتدرہ دونوں کے مخالف ہیں، خدا نے مجھے ملک کا محافظ بنایا، اسکے علاوہ کسی عہدے کی خواہش نہیں ۔
سہیل وڑائچ کے مطابق آرمی چیف نے کہا کہ سیاسی مصالحت سچے دل سے معافی مانگنے سے ممکن ہے، پاکستان کو چین اور امریکا سے تعلقات میں توازن برقرار رکھنے کا طویل تجربہ ہے، ایک دوست کیلئے دوسرے دوست کو قربان نہیں کریں گے، صدر ٹرمپ کی امن کی خواہش جینئیون ہے، پاکستان نے ٹرمپ کیلئے نوبل انعام کی سفارش میں پہل کی اب باقی دنیا پیروی کر رہی ہے۔
سہیل وڑائچ کے مطابق فیلڈ مارشل نے کہا کہ بھارت پراکسیز کے ذریعے پاکستان کے امن کو تباہ نہ کرے ، افغان حکومت طالبان کو پاکستان میں دھکیلنے کی پالیسی بند کرے ، ایک ایک پاکستانی کے خون کا بدلا لینا ہمارے لیے واجب ہے۔
آرمی چیف نے وزیراعظم کے خلوص کے ساتھ 18،18 گھنٹے کام کرنےکو سراہا، وزیراعظم اور کابینہ نے جنگ کے دوران جس عزم کا مظاہرہ کیا وہ قابل تعریف ہے۔
