انسداد دہشت گردی عدالت (اے ٹی سی) نے 9 مئی کے پرتشدد واقعات سے متعلق دو اہم مقدمات، راحت بیکری کے باہر جلاؤ گھیراؤ اور تھانہ شادمان جلاؤ گھیراؤ کا فیصلہ سناتے ہوئے پاکستان تحریک انصاف ( پی ٹی آئی ) کے وائس چیئرمین شاہ محمود قریشی کو بری کر دیا ہے۔
عدالت کی جانب سے سابق گورنر پنجاب عمر سرفراز چیمہ ، سابق صوبائی وزیر یاسمین راشد ، سینیٹر اعجاز چوہدری ، سابق صوبائی وزیر میاں محمود الرشید اور عائشہ بھٹہ کو دونوں مقدمات میں 10، 10 برس قید کی سزا سنائی گئی ہے۔
عدالت کی جانب سے عالیہ حمزہ اور صنم جاوید کو 5،5 برس قید کی سزا سنائی گئی۔
لازمی پڑھیں۔ 9 مئی جلاؤ گھیراؤ: راحت بیکری اور تھانہ شادمان مقدمات کا فیصلہ محفوظ
اے ٹی سی کے جج منظر علی گل نے کوٹ لکھپت جیل میں ٹرائل کے بعد محفوظ کیا گیا فیصلہ سنایا۔
ہفتے کے روز جج منظر علی گل کی سربراہی میں کوٹ لکھپت جیل میں سماعت ہوئی تھی جہاں وکلاء کے حتمی دلائل مکمل ہونے کے بعد عدالت نے فیصلہ محفوظ کیا تھا۔
سماعت کے دوران پاکستان تحریک انصاف کے رہنما شاہ محمود قریشی، ڈاکٹر یاسمین راشد، سینیٹر اعجاز چوہدری، عمر سرفراز چیمہ، میاں محمود الرشید سمیت دیگر ملزمان کمرہ عدالت میں موجود تھے۔
لازمی پڑھیں۔ پی ٹی آئی کا 9 مئی کیسز میں پارٹی رہنماؤں کو سزاؤں کا فیصلہ چیلنج کرنے کا اعلان
عدالتی فیصلے کے مطابق تھانہ شادمان جلاؤ گھیراؤ کے مقدمات میں 25 ملزمان ٹرائل کا سامنا کر رہے تھے جن میں سے 12 ملزمان کو بری کردیا گیا ہے جبکہ بری ہونے والوں میں سعدیہ، تسلیم ، ابرار امجد ، فیصل اور جمیل بھی شامل ہیں۔
بانی پی ٹی آئی کے سکیورٹی گارڈ حافظ ارشد کو بھی 10 سال قید کی سزا سنائی گی ہے۔
