خیبرپختونخوا کے 13 اضلاع میں 7 روز کےلیے دفعہ 144 نافذ کردی گئی۔
اعلامیے کے مطابق خیبرپختونخوا کے 13 اضلاع میں چہلم امام حسین کے موقع پر دفعہ 144نافذ کی گئی۔ موٹرسائیکل کی ڈبل سواری، وال چاکنگ، اشتعال انگیز تقریروں پر پابندی ہوگی۔
نوٹی فکیشن کے مطابق پشاور، کوہاٹ، ہنگو، بنوں، ٹانک، ڈیرہ اسماعیل خان، ایبٹ آباد، مانسہرہ، ہری پور، نوشہرہ، کرم، مردان اور لکی مروت میں 7 روز کےلیے دفعہ 144 نافذ کردی گئی۔
چہلم جلوسوں کی گزرگاہوں پر چھتوں پر موجودگی بھی ممنوع ہو گی، افغان باشندوں کی عوامی مقامات پر نقل و حرکت پر بھی پابندی عائد کردی گئی۔ اسلحہ کی نمائش، ہوائی فائرنگ، لاوڈاسپیکر، آتشبازی پر پابندی ہوگی۔
اعلامیے کے مطابق دفعہ 144 کے تحت 13 اضلاع میں غیر متعلقہ افراد کا داخلہ محدود کردیا گیا، شہریوں سے حکومتی احکامات پر سختی سے عمل کی اپیل کی گئی ہے۔
