کراچی میں سی ویو کے ساحل دو دریا کے قریب ایک افسوسناک واقعے میں ایک 40 سالہ شخص نے اپنے دو بچوں سمیت سمندر میں چھلانگ لگا دی۔
عینی شاہدین کے مطابق، 40 سالہ شخص نے پہلے 6 سے 7 سال کی عمر کے اپنے دو بچوں کو سمندر میں پھینکا اور پھر خود بھی چھلانگ لگا دی۔
واقعے کی اطلاع ملتے ہی ریسکیو ٹیمیں موقع پر پہنچ گئیں لیکن سات گھنٹے کی کوششوں کے باوجود اندھیرے کے باعث آپریشن روک دیا گیا۔
ریسکیو اہلکاروں نے بتایا کہ جمعہ کو نماز فجر کے بعد ڈوبنے والوں کی تلاش دوبارہ شروع کی جائے گی۔
پولیس کے مطابق تاحال ڈوبنے والے افراد کی شناخت نہیں ہو سکی۔
وزیراعلیٰ سندھ سید مراد علی شاہ نے واقعے کا نوٹس لیتے ہوئے ضلعی انتظامیہ اور پولیس کو فوری تحقیقات کا حکم دیا ہے۔
انہوں نے ریسکیو آپریشن کو مؤثر اور تیز کرنے کی ہدایت کی اور کہا کہ متاثرہ افراد کی تلاش کے لیے تمام وسائل بروئے کار لائے جائیں۔
