این ڈی ایم اے نے 3 اگست تک موسمی صورتحال اور ممکنہ خطرات پر الرٹ جاری کردیا، مختلف علاقوں میں اربن فلڈنگ اور ندی نالوں میں طغیانی کا خدشہ ہے، متعلقہ اداروں کو ممکنہ خطرات سے نمٹنے کیلئے پیشگی اقدامات اور تیاری کی ہدایت جاری کی گئی ہے۔
نیشنل ڈیزاسٹر مینجمنٹ اتھارٹی (این ڈی ایم اے) نے 3 اگست تک موسمی صورتحال اور ممکنہ خطرات پر الرٹ جاری کردیا۔ ترجمان کا کہنا ہے کہ ملک کے مختلف علاقوں میں اربن فلڈنگ اور ندی نالوں میں طغیانی کا خدشہ ہے۔
ترجمان این ڈی ایم اے نے کہا ہے کہ گلگت بلتستان اور خیبرپختونخوا کے علاقوں میں گلیشائی جھیلوں کے سیلاب (گلاف) کا خطرہ ہے جبکہ اسلام آباد، راولپنڈی، گوجرانوالہ، لاہور، سیالکوٹ اور خوشاب میں اربن فلڈنگ کا خدشہ ہے۔
ترجمان کا کہنا ہے کہ مذکورہ تاریخوں تک بین، بسنتر اور ڈیگ نالوں کے بہاؤ میں اضافے کا امکان ہے، خیبرپختونخوا کے علاقوں میں اگلے 12 تا 24 گھنٹوں کے دوران شدید بارشیں متوقع ہے، نشیبی علاقوں میں اچانک سیلاب جبکہ پہاڑی علاقوں میں لینڈ سلائیڈنگ کا خطرہ ہے۔
این ڈی ایم اے ترجمان نے بتایا کہ چترال، دیر، سوات، کالام، مانسہرہ، بٹگرام میں بارشوں کا امکان ہے، ایبٹ آباد، ہری پور، صوابی، مردان، پشاور اور چارسدہ میں بارش متوقع ہے۔
نیشنل ڈیزاسٹر مینجمنٹ اتھارٹی نے کوہاٹ، ہنگو، بنوں، لکی مروت، ڈی آئی خان میں موسلا دھار بارش کی پیشگوئی کی ہے، گلگت بلتستان اور خیبر پختونخوا میں جھیلوں کے پھٹنے کے باعث سیلابی صورتحال کا خطرہ ہے، متعلقہ اداروں کو ممکنہ خطرات سے نمٹنے کیلئے پیشگی اقدامات اور تیاری کی ہدایت جاری کی گئی ہے۔
