سابق وفاقی وزیر اور آل پاکستان ٹیکسٹائل ملز ایسوسی ایشن (اپٹما) کے پیٹرن ان چیف گوہر اعجاز نے کہا ہے کہ فیلڈ مارشل جنرل عاصم منیر کا تاجر برادری کے ساتھ مضبوط تعلق ہے اور انہوں نے کراچی اور لاہور میں 300، 300 کاروباری شخصیات کو سیشنز میں مدعو کیا جو معاشی اصلاحات اور کاروباری سہولیات پر تبادلہ خیال کے لیے اہم ہیں۔
سماء کے پروگرام ’ ندیم ملک لائیو ‘ میں گفتگو کرتے ہوئے گوہر اعجاز نے پاک فوج کی تعریف کی اور کہا کہ بھارت کے خلاف جنگ میں پاک فوج نے ثابت کیا کہ وہ دنیا کی بہترین فوج ہے۔
گوہر اعجاز نے کہا کہ وزیراعظم اور فیلڈ مارشل ہر چیز کو مستقل مانیٹر کر رہے ہیں تاکہ معیشت کو مستحکم کیا جا سکے اور تاجر برادری کو سہولیات فراہم کرنے کے لیے ہر ممکن کوشش کی جا رہی ہے۔
انہوں نے معاشی پالیسیوں پر بات کرتے ہوئے کہا کہ ہمیں پائیدار گروتھ کی ضرورت ہے اور معیشت کے "ہیٹ اپ" ہونے سے بچنے کے لیے 3 ٹریلین روپے خرچ کیے جا رہے ہیں۔
انہوں نے زور دیا کہ ڈیمز کی تعمیر اور دفاع پر خرچ ہونا چاہیے نہ کہ شرح سود پر جبکہ موجودہ 11 فیصد شرح سود کو 9 فیصد تک لانے کا مطالبہ کرتے ہوئے انہوں نے کہا کہ شرح سود کی وجہ سے کوئی "بوم اینڈ برسٹ" سائیکل نہیں آیا۔
ان کا کہنا تھا کہ ہمیں 10 فیصد گروتھ کا ہدف رکھنا چاہیے جس سے معیشت 35 فیصد تک ترقی کر سکتی ہے۔
گوہر اعجاز نے بجلی کے شعبے پر تبصرہ کرتے ہوئے کہا کہ پاکستان کے پاس بجلی سرپلس ہے لیکن 6 گھنٹے کے پیک ٹیرف کا نظام 2016 کے دور سے چلا آ رہا ہے جب بجلی کی کمی تھی۔
انہوں نے مطالبہ کیا کہ پیک ٹیرف کا نظام ختم کیا جائے اور انڈسٹری کو 24 گھنٹے کا یکساں ٹیرف دیا جائے تاکہ صنعتی سرگرمیوں کو فروغ ملے۔
انہوں نے حکومت سے اپیل کی کہ وہ اپنی انڈسٹری پر اعتماد کرے اور کاروباری برادری کے تحفظات دور کرتے ہوئے معاشی اصلاحات کو تیز کرے۔
