پاکستان کے نائب وزیراعظم اور وزیر خارجہ اسحاق ڈار کی امریکی وزیر خارجہ مارکو روبیو سے ٹیلیفونک گفتگو ہوئی جس دوران ٹیرف سمیت اہم دو طرفہ معاملات ، باہمی دلچسپی کے علاقائی و عالمی امور پر تبادلہ خیا ل کیا گیا ۔
تفصیلات کے مطابق اسحاق ڈار اور امریکی وزیر خارجہ مارکو روبیو کے درمیان واشنگٹن ڈی سی میں گزشتہ جمعہ کو نتیجہ خیز ملاقات کے بعد یہ رابطہ ہوا ہے ۔
یاد رہے کہ اس سے قبل اسحاق ڈار نے اقوام متحدہ میں مسئلہ فلسطین کے دو ریاستی حل پر بین الاقوامی کانفرنس کی سائیڈ لائنز میں غیر ملکی رہنماوں سے اہم ملاقاتیں کیں جن میں بنگلہ دیش کے مشیر برائے امور خارجہ توحید حسین اور مصر کے وزیر خارجہ ڈاکٹر بدر عبدالعاطی شامل ہیں ۔
اسحاق ڈار اور بنگلہ دیش کے مشیر برائے امور خارجہ توحید حسین نے ملاقات میں دوطرفہ تعلقات کا جائزہ لیا جبکہ سیاسی،اقتصادی اورثقافتی تعاون کو مزید مضبوط کرنے روابط کو فروغ دینے کے عزم کا اظہار کیا ۔ رہنماؤں نے غزہ میں سنگین انسانی بحران اور اسرائیلی جارحیت پر اظہار تشویش کیا ۔
دونوں رہنماوں نے فلسطینی عوام کیساتھ غیر متزلزل یکجہتی اور کانفرنس کے بامعنی نتائج نکلنے کی اُمید کا اظہار کیا جبکہ ملاقات میں فریقین کی جانب سے مستقبل قریب میں اعلیٰ سطح کے دورے کرنے پر اتفاق بھی کیا گیا ۔
نائب وزیراعظم و وزیر خارجہ اسحاق ڈار نے مصر کے وزیر خارجہ ڈاکٹر بدر عبدالعاطی سے بھی ملاقات کی جس دوران فریقین کا معدنیات، دفاع، تجارت اور سرمایہ کاری سمیت دیگر شعبوں میں وسیع البنیاد تعاون بڑھانے پر زور دیا گیا ۔
دونوں رہنماوں نے پاکستان اور مصر کے درمیان اقتصادی تعاون کے فروغ اور تجارت کو آسان بنانے کیلئے روابط مضبوط بنانے ، مستقبل قریب میں اعلیٰ سطح وفود کے تبادلے کرنے پر اتفاق کیا ۔
فلسطینیوں کی غیر متزلزل حمایت کا اعادہ ، غزہ میں انسانی ہمدردی کی بنیاد پر امداد کی رسائی فراہم کرنے پر زور دیا ، فریقین نے کہا کہ امید ہے دو ریاستی حل پر بین الاقوامی کانفرنس کے بامعنی اور تعمیری نتائج نکلیں گے۔
