وزیر خزانہ محمد اورنگزیب کی زیر صدارت اقتصادی رابطہ کمیٹی کا اجلاس ہوا جس دوران گھی ، کوکنگ آئل کی قیمتوں میں اضافے کا نوٹس لیا گیا اور عالمی قیمتوں میں کمی کے باوجود عوام کو پورا ریلیف نہ ملنے پر اظہار تشویش کیا گیا ۔
تفصیلات کے مطابق ای سی سی اجلاس میں وزارت صنعت کی جانب سے گھی، کوکنگ آئل کی دستیابی اور قیمتوں پر بریفنگ دی گئی، کمیٹی نے قیمتوں میں اضافے اور کارٹلائزیشن کی روک تھام کی ہدایت کی جبکہ مسابقتی کمیشن، نیشنل پرائس کمیٹی، صوبائی حکومتوں کےدرمیان روابط پر زور دیا گیا ۔ای سی سی کا کہناتھا کہ وزارت صنت اس حوالے سے اسٹیک ہولڈرز سےکوآرڈینیشن کرے۔
اجلاس میں ای سی سی نے سستے گھروں کی تعمیر کیلئے اسکیم کی منظوری دےدی ہے جبکہ مارک اپ سبسڈی رسک شیئرنگ اسکیم کے تحت مالی معاونت کا فیصلہ بھی کر لیا گیا ۔
ذرائع کے مطابق حکومت 50 ہزار گھروں کی تعمیر کیلئے سبسڈی فراہم کرے گی، 20 سے 35 لاکھ تک کا قرضہ 20 سال کی مدت کیلئے دینے کی تجویز دی گئی ہے ۔ ملک میں لو کاسٹ ہاؤسنگ کو فروغ دیا جائے گا۔ وزارت ہاؤسنگ کو اس شعبے کا جامع ڈیٹا بیس تیار کرنے کی ہدایت کر دی گئی ہے ۔
اس مقصد کیلئے وفاقی اور صوبائی اسٹیک ہولڈرز سے مشاورت کی ہدایت کی گئی ہے ۔
اقتصادی رابطہ کمیٹی کے اجلاس میں شپ بریکنگ ری سائیکلنگ کو باقاعدہ صنعت کا درجہ دینے ، پاکستان اسکل امپیکٹ بانڈ کے اجراء کیلئے 1 ارب روپےکی گارنٹی کی منظوری دیدی گئی ہے ۔اس کے تحت ملک میں اسکل ڈیویلپمنٹ کی حوصلہ افزائی کی جائے گی ۔
اجلاس میں نیشنل ٹیرف پالیسی 30-2025 کے تحت اسٹیل سیکٹر کے فروغ کا فیصلہ کیا گیاہے ، وزارت خزانہ نے کہا کہ اسٹیل کے شعبے کو برآمدات کی بنیاد پر ترقی دی جائے گی۔ ای سی سی نے ریڈیو بیسڈ سروسز کے چارجز پر نظرثانی کی منظوری دے دیدی ہے ۔نجی کمپنی کو گیس ٹیرف میں رعایت کیخلاف عدالت عظمیٰ سےرجوع کا فیصلہ کیا گیاہے ۔
