وفاقی وزیر مواصلات عبدالعلیم خان سے انٹرنیشنل روڈ ٹرانسپورٹ یونٹ کے سیکرٹری جنرل امبریٹو ڈی پریٹو نے ملاقات کی۔ جس دوران مرحلہ وار ٹریننگ اور محفوظ ڈرائیونگ کے فروغ سے متعلق اہم فیصلے کیے گئے، عبدالعلیم خان کا کہنا تھا کہ انسانی جانوں کا تحفظ حکومت کی اولین ترجیح ہے۔
وفاقی وزیر مواصلات عبدالعلیم خان کا انٹرنیشنل روڈ ٹرانسپورٹ یونٹ کے سیکرٹری جنرل امبریٹو ڈی پریٹو سے ملاقات میں کہنا تھا کہ بغیر ٹیسٹ کے ڈرائیونگ لائسنس کا اجرا ایک بڑا مسئلہ ہے۔ قوانین موجود ہیں تاہم اصل ضرورت ان پر سختی سے عملدرآمد کرانے کی ہے۔ انہوں نے کہا کہ پہلے مرحلے میں کمرشل ڈرائیورز کی باقاعدہ ٹریننگ مکمل کی جائے گی۔
وفاقی وزیر نے آئی آر یو کی معاونت کو اہم قرار دیتے ہوئے کہا کہ طے شدہ امور پر مکمل عملدرآمد حکومت کی ذمہ داری ہے۔اجلاس میں آئی آر یو کے سیکرٹری جنرل نے وفاقی وزیر کو تفصیلی بریفنگ دی۔امبریٹو ڈی پریٹو نے کہا کہ جدید تقاضوں کے مطابق ڈرائیورز کی آن لائن ٹریننگ کرائی جا رہی ہے۔انہوں نے بتایا کہ پچاسی فیصد حادثات انسانی غلطیوں کی وجہ سے ہوتے ہیں۔
آئی آر یو نے ڈرائیوز اور ٹرانسپورٹ آپریٹرز کے لیے بین الاقوامی سرٹیفکیشن متعارف کرا رکھی ہے۔سیکرٹری جنرل آئی آر یو کا کہنا تھا کہ ان کا ادارہ پاکستان میں کام کرنے اور دوطرفہ تعاون کے لیے مکمل تیار ہے۔ اجلاس میں سیکرٹری مواصلات۔۔ڈی جی این ایل سی اور آئی جی موٹروے پولیس کی موجودگی میں مرحلہ وار ٹریننگ سے متعلق کئی اہم فیصلے کیے گئے۔وفاقی وزیر نے محفوظ ڈرائیونگ کو یقینی بنانے کے لیے تمام متعلقہ اداروں کو مربوط اقدامات کی ہدایت کی۔
