چیف جسٹس پاکستان جسٹس یحییٰ آفریدی کا کہنا ہے کہ عدالتی نظام میں ٹیکنالوجی کا انضمام وقت کی ضرورت ہے۔
پیر کو اسلام آباد میں قانون و انصاف کمیشن کی جانب سے عدالتی نظام میں ٹیکنالوجی کے استعمال پر سمپوزیم میں چیف جسٹس پاکستان یحییٰ آفریدی، سپریم کورٹ کے ججز اور ماہرین نے شرکت کی جس میں جسٹس شاہد وحید نے پاکستان کے عدالتی نظام میں معلوماتی ٹیکنالوجی کی پیشرفت اور ارتقاء کا جائزہ پیش کیا۔
چیف جسٹس پاکستان نے نیشنل جوڈیشل آٹومیشن کمیٹی کے اقدامات کو سراہا۔
اس موقع پر خطاب کرتے ہوئے چیف جسٹس کا کہنا تھا کہ عدالتی نظام میں ٹیکنالوجی کا انضمام وقت کی ضرورت ہے، عدالتوں کو عوام کے لیے مزید قابل رسائی اور شفاف بنایا جائے گا۔
چیف جسٹس کا کہنا تھا کہ سپریم کورٹ میں ای فائلنگ، ویڈیو لنک اور ڈیٹا اینالٹکس کا نفاذ کر رہے ہیں۔
انہوں نے مزید کہا کہ عدالتی ڈیجیٹل تبدیلی کے لیے قومی فریم ورک ناگزیر ہے اور عوامی اعتماد اور انصاف کی بہتری کیلئے ٹیکنالوجی کا استعمال لازم ہے۔
