وفاقی وزیر دفاع خواجہ آصف نے بھارت کو واضح پیغام دیتے ہوئے کہاہے کہ بھارت کے ساتھ تصادم ناگزیرہوگیا،کسی بھی وقت ہوسکتاہے، بھارت نے پاکستان کے اندر آنے کی کوشش کی تو گھر پہنچا کر آئیں گے ۔
وزیردفاع خواجہ آصف کا کہناتھا کہ بھارت نے پاکستان کے اندر آنے کی کوشش کی تو گھر پہنچا کرآئیں گے، ہماری سر زمین کے ٹکڑے پر قبضے کی حکمت عملی بھارت کو مہنگی پڑے گی، بھارتی رافیل طیارے سرحد کے بہت قریب آئے تھے لیکن ان کا سسٹم جام ہو گیا۔
انہوں نے کہا کہ ہم نے بھارت کے ہر اقدام کا سدباب کیا ہوا ہے، بھارت کی تمام تیاریاں ہماری نظر میں ہیں،مسلسل نگرانی کر رہے ہیں، ہم ہاتھ پر ہاتھ رکھ کر نہیں بیٹھے،ہماری پوری تیاری ہے، بھارت نے پانی روکنے کیلئے تعمیرات کیں تو انہیں تباہ کر دیں گے، پاکستان میں کوئی جنگی ماحول اورخوف نہیں۔
