وفاقی وزیر اطلاعات عطاء اللہ تارڑ نے کہا ہے کہ ہمارے پاس مستند انٹیلی جنس اطلاعات تھیں کہ بھارت پاکستان پر حملہ کرے گا۔
عالمی نشریاتی ادارے سے گفتگو کرتے ہوئے وفاقی وزیر اطلاعات عطاء اللہ تارڑ کا کہنا تھا کہ بھارت نے بغیر شواہد کے پاکستان پر الزامات عائد کئے ہیں حالانکہ پہلگام واقعہ کا ذمہ دار بھارت خود ہے اور بھارت کے پاس کسی قسم کے شواہد موجود نہیں۔
وفاقی وزیر کا کہنا تھا کہ ہمارے پاس مستند انٹیلی جنس اطلاعات تھیں کہ بھارت پاکستان پر حملہ کرے گا، ہمارا فرض ہے کہ یہ معلومات عالمی برادری سے شیئر کریں، پاک فوج بہادر فورس ہے جو وطن عزیز کا دفاع کرنا جانتی ہے۔
عطاء اللہ تارڑ کا کہنا تھا کہ پاکستان کے عوام پرعزم اور اپنے وطن کے لئے متحد ہیں، پاکستان پرامن ملک ہے اور ہمیشہ پرامن بقائے باہمی کا خواہاں رہا ہے، پاکستان اپنے دفاع کا حق رکھتا ہے۔
ان کا کہنا تھا کہ پاکستان نے پہلگام واقعہ کی منصفانہ اور شفاف تحقیقات کی پیشکش کی، بھارت نے ایسے واقعات کے الزامات بغیر تحقیقات کے پاکستان پر عائد کئے، بھارت کے پاس الزام ثابت کرنے کے لئے کوئی ثبوت نہیں ہیں۔
انہوں نے سوال اٹھایا کہ کیا بھارت کے پاس کوئی شواہد ہیں کہ پہلگام حملے میں ملوث شدت پسند پاکستان میں مقیم ہیں؟۔
وفاقی وزیر کا کہنا تھا کہ بھارت کی حکومت اب تک کسی ایک گروپ کا تعین نہیں کر سکی جو اس واقعہ میں ملوث ہو، بھارت کو دنیا کو بتانا ہوگا کہ اس میں کون ملوث ہے، صرف یہ الزام عائد نہیں کیا جا سکتا کہ اس کے پیچھے پاکستان ہے، پاکستان نے اس واقعہ پر منصفانہ اور غیر جانبدارانہ تحقیقات کی پیشکش بھی کی۔
ان کا کہنا تھا کہ پاکستان اپنے دوست ممالک کے ساتھ رابطے میں اور ہم اپنا نکتہ نظر پیش کر رہے ہیں۔
عطاء تارڑ کا کہنا تھا کہ اس ساری صورتحال میں پاکستان نہ تو جارح ہے اور نہ ہی اشتعال دلانے والا، کشیدگی میں اضافے میں پاکستان کا کوئی کردار نہیں، پاکستان اپنے دفاع کا حق رکھتا ہے اور ہم اپنے ملک کا دفاع کریں گے۔
ان کا مزید کہنا تھا کہ پاکستان کی مسلح افواج چوکس اور کسی بھی جارحیت کا مقابلہ کرنے کے لئے تیار ہیں۔
